Mumabi, 21 July : राज्यात गेल्या काही दिवसांपासून ठाकरे ब्रॅंडची चर्चा रंगली आहे. विशेषतः शिवसेना उद्धव बाळासाहेब ठाकर पक्षाचे प्रमुख उद्धव ठाकरे यांनीही याबाबत भाष्य केलेले आहे. हा ठाकरे ब्रॅंड आम्ही बनवलेली नाही, तर तो लोकांनी स्वीकारलेला आहे, असे त्यांनी म्हटले होते. मात्र, त्यावर आता माजी आमदार कपिल पाटील यांनी तीव्र आक्षेप नोंदविला आहे.
ठाकरे नाव मोठे आहे. वाद नाही. पण... ते लक्ष्मण रेषा ओलांडत आहेत. कृपया महाराष्ट्राचा अवमान करू नका, ठाकरे ‘ब्रॅण्ड’ असतील तर शिवसेना उबाठाचे (Shivsena UBT). महाराष्ट्राचे नव्हेत, असा इशारा माजी आमदार पाटील यांनी ठाकरे यांना दिला आहे. त्यामुळे आता ठाकरे ब्रॅंडवरून राज्यात राजकारण रंगण्याची चिन्हे आहेत.
शिक्षक मतदारसंघाचे माजी आमदार कपिल पाटील (Kapil Patil) यांनी आता थेट ठाकरे यांना अंगावर घेतले आहे. तेही ठाकरे ब्रॅंडवरून. हिंदी सक्तीच्या विरोधात मोर्चा काढण्याचा निर्णय उद्धव ठाकरे आणि राज ठाकरे यांनी घेतला होता. त्यांनी सर्वच राजकीय पक्षाच्या नेत्यांना आमंत्रित केले होते. मात्र, सरकारने हिंदी सक्तीचा निर्णय मागे घेतला, त्यानंतर राज्यात ठाकरे ब्रॅंडची चर्चा जोरात सुरू आहे.
राज ठाकरे यांनीही त्याबाबत भाष्य केले होते. तसेच, ‘सामना’ने घेतलेल्या मुलाखतीत उद्धव ठाकरे (Uddhav Thackeray) यांनीही ठाकरे ब्रॅंडच्या अनुषंगाने प्रतिक्रिया दिली होती. त्यावरून आता ठाकरे ब्रॅंडवरून राजकारण रंगण्याची चिन्हे आहेत. कारण माजी शिक्षक आमदार कपिल पाटील यांनी तर सामाजिक माध्यमांवर पोस्ट लिहून ठाकरेंना इशारा दिला आहे.
माजी आमदार पाटील यांनी आपल्या पोस्टमध्ये म्हटले आहे की, ठाकरे ‘ब्रॅण्ड’ असतील तर शिवसेना उबाठाचे. महाराष्ट्राचे नव्हेत. ‘सामना’च्या मुलाखतीत उद्धव ठाकरे म्हणतात, ठाकरे ब्रॅण्ड म्हणजे महाराष्ट्राची ओळख. हिंदुत्वाची ओळख. ते ‘ठाकरी हिंदुत्वाची’ ओळख असू शकतात किंवा ‘सावरकरी हिंदुत्वाची’. पण, छत्रपती शिवरायांच्या ‘हिंदवी’ची कधीच नव्हे.
ते म्हणाले, छत्रपती शिवराय हिच महाराष्ट्राची, मराठी माणसाची अस्मिता आहे. फुले-शाहू-आंबेडकर हिच महाराष्ट्राची ओळख आहे. ज्ञानदेव, तुकाराम आणि चक्रधर हीच महाराष्ट्र धर्माची लक्ष्मण रेषा आहे. ठाकरे नाव मोठे आहे. वाद नाही. पण ...
काँग्रेसचे अध्यक्ष बरुआ यांनी 'इंदिरा इज इंडिया, इंडिया इज इंदिरा' असं म्हटलं होतं. आता ठाकरे स्वतःच स्वतःला 'महाराष्ट्र' म्हणत आहेत. ते लक्ष्मण रेषा ओलांडत आहेत. कृपया महाराष्ट्राचा अवमान करू नका, असे आवाहन पाटील यांनी केले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.