Maharashtra Ekikaran Samiti : बेळगावमधील वातावरण तापलं; समितीच्या पदाधिकाऱ्यांची धरपकड, पाच ठिकाणी जमावबंदी, ठाकरेंच्या शिवसैनिकांना रोखलं

Mumbai News : बेळगावमधील महाराष्ट्र एकीकरण समितीने आयोजित केलेल्या मराठी भाषिक महामेळाव्यावरून राजकारण तापलं आहे. कर्नाटक आणि महाराष्ट्राच्या बेळगाव भागातील सीमेवर पोलिस बंदोबस्तात वाढ केलीय.

कर्नाटक पोलिसांनी बेळगावमध्ये संचारबंदी लागू केली असून महाराष्ट्र एकीकरण समितीच्या पदाधिकाऱ्यांची धरपकड चालू केल्याचे पडसाद महाराष्ट्रात उमटलेत. शिवसेना उद्धव बाळासाहेब ठाकरे पक्षाचे खासदार संजय राऊत यावरून आक्रमक झाले आहेत. तर उपमुख्यमंत्री एकनाथ शिंदे यांच्या शिवसेनेचे उदय सामंत आणि काही पदाधिकारी बेळगावला जाणार असल्याची घोषणेवर संजय राऊत यांनी टीका केली आहे.

महाराष्ट्र एकीकरण समितीने आज बेळगावमध्ये मराठी भाषिकांचा महामेळावा आयोजित केला आहे. याच दरम्यान इथं कर्नाटक सरकारचे विधिमंडळ अधिवेशन आहे. मराठी भाषिकांच्या महामेळाव्याला कर्नाटक सरकारने परवानगी दिलेली नाही. उलट, कर्नाटक पोलिसांनी (Police) महामेळाव्याच्या परिसर भागात संचारबंदी लागू केली आहे. तसंच एकीकरण समितीच्या पदाधिकाऱ्यांची धरपकड सुरू केली आहे. कर्नाटक पोलिसांच्या या भूमिकेचे महाराष्ट्रात पडसाद उमटू लागले आहे.

शिवसेना (Shivsena) उद्धव बाळासाहेब ठाकरे पक्षाचे शिवसैनिकांनी बेळगावकडे रवाना झालेत. या पदाधिकाऱ्यांची वाहने पोलिसांनी अडवले असून, त्यांना पुढं पाठवलं जात नाही. यामुळे शिवसैनिक आक्रमक झालेत. महाराष्ट्रातील पोलिसांनी देखील सीमा भागात बंदोबस्त वाढवला आहे. बेळगावच्या धर्मवीर संभाजी चौक इथं सोमवारी सकाळी अकरा वाजता महाराष्ट्र एकीकरण समितीचा महामेळावा होणार आहे. या पार्श्वभूमीवर पोलिसांनी धर्मवीर संभाजी चौक, छत्रपती संभाजी उद्यान, छत्रपती शिवाजी महाराज उद्यान, लेले ग्राउंड, व्हॅक्सिन डेपो, अशा पाच ठिकाणी जमाव बंदीचा आदेश लागू केला आहे.

एकीकरण समितीचे नेते आर.एम.चौगुले यांनी महाराष्ट्रात जाण्यासाठी आम्ही आंदोलन करत आहोत. महाराष्ट्रात गेल्यावरच हे आंदोलन बंद होईल. यापूर्वी देखील अनेकदा पोलिसांमार्फत आमच्यावर दबाव आणला गेला. कायद्याचा धाक दाखवला गेला. कायद्याला पुढं करत आता अटक केली जात आहे. ताब्यात घेतलं जात आहे. नजरकैदीत ठेवलं जात आहे. परंतु आंदोलनाला कितीही आडकाठी आणली तरी आता माघार घेणार नाही. कोणत्याही परिस्थितीत सोमवारी आम्ही महामेळावा होणार, असे सांगितले.

उपमुख्यमंत्री एकनाथ शिंदे यांच्या शिवसेना पक्षातील नेते उदय सामंत यांनी मी आणि काही पदाधिकारी बेळगावमध्ये जाणार असल्याची घोषणा केली आहे. त्यावर शिवसेना उद्धव बाळासाहेब ठाकरे पक्षाचे नेते खासदार संजय राऊत यांनी जोरदार टीका केली आहे. "एकनाथ शिंदे कधीही बेळगाव गेले नाहीत. मंत्री असताना शिंदे यांच्याकडे सीमाभागाची विशेष जबाबदारी होती. अटक होईल, या भीतीने ते कधीही बेळगावला गेले नाहीत.

शिंदेंनी कधीही बेळगावमधील मराठी जनतेकडे पाहिले नाही. कर्नाटकमध्ये काँग्रेसचे राज्य आहे, ही पळवाट नाही, असे सांगून बेळगावमधील मराठी भाषिकांच्या मागे शिवसेना उद्धव बाळासाहेब ठाकरे पक्ष ठामपणे उभा आहे आणि तिथं आमचे शिवसैनिक महामेळाव्यात सहभागी होतील, असे खासदार संजय राऊत यांनी म्हटले.