मोठी बातमी : महापालिकेत बाजी मारली, पण कोर्टात अडकली; शिवसेना शिंदे गटाला जबरदस्त दणका, हायकोर्टाच्या 'त्या' आदेशाने धाकधूक वाढली

Mumbai News : राज्यात नुकत्याच पार पडलेल्या 29 महानगरपालिकेच्या निवडणुकीत एकनाथ शिंदे यांच्या शिवसेनेने मोठे यश मिळवले. त्या यशामुळे सर्वत्र जल्लोष केला जात आहे. या विजयानंतर केलेल्या धुरळा खाली बसण्याआधीच आता मोठी बातमी समोर येत आहे. मुंबई हायकोर्टाने दिलेल्या आदेशाने एकनाथ शिंदे यांच्या शिवसेनेसमोरील अडचणी वाढल्या आहेत.

मुंबई उच्च न्यायालयाने दिलेल्या आदेशामुळे अंबरनाथ नगरपालिकेच्या निवडणुकीत मोठा ट्विस्ट आला आहे. त्याठिकाणच्या सभापती निवड व सहा समित्यांची निवड करण्यासाठी सोमवारी भरवण्यात येणारी सभा संध्याकाळी पाच वाजेपर्यंत तहकूब करण्याचे निर्देश उच्च न्यायालयाने दिले आहेत. त्यामुळे आता एकनाथ शिंदे यांच्या शिवसेनेची धाकधूक वाढली आहे.

अंबरनाथ नगरपालिकेच्या सभापती निवड व सहा समित्यांची निवड करण्यासाठी सोमवारी भरवण्यात येणारी सभा संध्याकाळी पाच वाजेपर्यंत तहकूब करण्याचे निर्देश उच्च न्यायालयाने दिले. शिवसेना (Shivsena) शिंदे गटाने स्थापन केलेली आघाडी मान्य करण्याच्या ठाणे जिल्हाधिकाऱ्यांच्या निर्णयाला अंबरनाथ विकास आघाडीने उच्च न्यायालयात आव्हान दिले आहे, त्यावर आता न्यायालयाने हा निर्णय दिला आहे. यामुळे आता अंबरनाथच्या राजकारणात पुन्हा एकदा मोठा भूकंप होण्याची शक्यता आहे.

अंबरनाथ नगरपालिकेत शिवसेना शिंदे गट आणि राष्ट्रवादी अजित पवार पक्षाने एकत्र येत सत्ता स्थापन केली असली तरी विषय समित्यांच्या सभापतींच्या निवडीचा मुद्दा गाजला आहे. भाजप, काँग्रेस (Congress), राष्ट्रवादी अजित पवार गट आणि एका अपक्षाने मिळून अंबरनाथ नगरपालिकेत अंबरनाथ विकास आघाडी स्थापन केली, मात्र, ऐनवेळी राष्ट्रवादी अजित पवार गटाने शिवसेना शिंदे गटाशी हातमिळवणी केल्याने या नगरपालिकेत शिवसेना शिंदे गटाची सत्ता आली. भाजपला सत्तेपासून दूर राहावे लागले होते.

दुसरीकडे, राष्ट्रवादी अजित पवार पक्षाने आधी भाजप बरोबर केलेली आघाडी तोडण्यात यावी, यासाठी ठाणे जिल्हाधिकाऱ्यांकडे धाव घेतली होती. भाजपबरोबर आघाडी स्थापन करण्यासाठी दिलेली प्रतिज्ञापत्रे मागे घेऊन, तो निर्णय मागे घ्यावा, अशी मागणी राष्ट्रवादी अजित पवार पक्षाच्या नगरसेवकांनी जिल्हाधिकाऱ्यांकडे केली होती. जिल्हाधिकाऱ्यांनी त्यांची विनंती मान्य करत 9 जानेवारी रोजी शिवसेना शिंदे गट आणि राष्ट्रवादी अजित पवार गटाच्या युतीला मान्यता दिली होती, त्यामुळे या नगरपालिकेत शिवसेनेची सत्ता आली होती.

दरम्यान, याविरोधात भाजपच्या नेतृत्वाखालील अंबरनाथ विकास आघाडीने उच्च न्यायालयात धाव घेतली होती. न्या. रवींद्र घुगे आणि न्या. अभय मंत्री यांच्या खंडपीठापुढे या याचिकेवर सुनावणी पार पडली, या याचिकेवर निर्णय देताना हायकोर्टाने सोमवारी विषय समित्यांच्या सभापतींची निवड करण्यासाठी बोलावण्यात आलेली सभा सोमवारी संध्याकाळी पाच वाजेपर्यंत तहकूब करण्याचे आदेश दिले आहेत. यामुळे आता एकनाथ शिंदे यांच्या शिवसेनेची धाकधूक वाढली आहे.