Dharashiv Muncipal Politcis : धाराशिव जिल्हयात राणा पाटील, तानाजी सावंतांचा करिष्मा कायम; महाविकास आघाडीला धक्का; शिवसेना, भाजपचे चार-चार नगराध्यक्ष विजयी

Dharashiv Election Result : धाराशिव जिल्ह्यातील आठ नगरपालिकेच्या नगराध्यक्षपदासाठी 2 डिसेंबरला निवडणूक झाली होती. त्यामध्ये धाराशिव जिल्ह्यात पुन्हा एकदा भाजपचे आमदार राणाजगजीतसिंह पाटील, माजी मंत्री तानाजी सावंतांचा करिष्मा कायम आहे. एकनाथ शिंदे यांच्या शिवसेनेने कळंब, भूम, परंडा, उमरगा या चार, ठिकाणी नगराध्यक्ष पदाचे उमेदवार विजयी झाले तर भाजपचे धाराशिव, तुळजापूर, नळदुर्ग, मुरूम हे चार ठिकाणी नगराध्यक्ष पदाचे उमेदवार विजयी झाले. तर धाराशिव नगरपालिका निवडणुकीत भाजप व शरद पवार यांच्या राष्ट्रवादी काँग्रेसमध्ये चुरशीची लढत सुरु आहे.

धाराशिव जिल्ह्यातील आठ नगरपालिका निवडणुकीसाठी दोन डिसेंबरला मतदान पार पडले. उमेदवारी अर्ज दाखल करण्याच्या शेवटच्या दिवशी महाविकास आघाडीत बिघाडी झाली होती. महायुतीमधील भाजप, एकनाथ शिंदे यांची शिवसेना व अजित पवार यांची राष्ट्रवादी काँग्रेस या महायुतीमधील तीन मित्रपक्षांने एकत्रित निवडणूक लढवणार असल्याचा निर्धार केला होता. मात्र, महायुतीमध्ये बिघाडी झाली होती. परंडा, भूम येथे माजी मंत्री तानाजी सावंतांविरोधात भाजपसह सर्वपक्षांने टाईट फिल्डिंग लावली होती. तर धाराशिव जिल्ह्यातील आठही नगरपरिषदांच्या निवडणुकीत अटातटीची लढत पाहवयास मिळाली.

धाराशिव नगरपालिकेत नगराध्यक्षपदासाठी उद्धव ठाकरे यांची शिवसेना व काँग्रेस एकत्र आली होती. याठिकाणी ठाकरे सेनेच्या संगीता गुरव व राष्ट्रवादी काँग्रेस शरद पवार पक्षाच्या प्रविणा कुरेशी व भाजपच्या नेहा राहुल काकडे यांच्यात तिरंगी लढत झाली. या ठिकाणी काही फेऱ्यांची मतमोजणी शिल्लक राहिली असून याठिकाणी राष्ट्रवादीच्या कुरेशी व भाजपच्या काकडेमध्ये चुरशीची लढत सुरु आहे. या ठिकाणी राष्ट्रवादीच्या कुरेशी व भाजपच्या काकडेमध्ये चुरशीची लढत झाली. त्यामध्ये भाजपच्या नेहा काकडे या विजयी झाल्या आहेत.

कळंब नगरपालिका निवडणुकीत महायुतीच्या एकनाथ शिंदे यांच्या शिवसेनेच्या सुनंदा कापसे या विजयी झाल्या. त्यांनी राष्ट्रवादी काँग्रेसच्या डॉ. मीनाक्षी भवर तर ठाकरे यांच्या शिवसेनेच्या रश्मी मुंदडा यांचा पराभव केला. याठिकाणी महायुतीमध्ये फूट पडली पडली होती. अजित पवार यांचा राष्ट्रवादी काँग्रेसने या ठिकाणी स्वबळावर निवडणूक लढवली आहे.

तुळजापूरमध्ये भाजपचे विनोद (पिटू) गंगणे विजयी झाले त्यांनी महाविकास आघाडीच्या अमर मगर यांचा पराभव केला. नळदुर्ग नगरपालिकेत भाजपचे बसवराज धरणे हे विजयी झाले. त्यांनी काँग्रेसचे उमेदवार अशोक जगदाळे व एमआयएमचे शहबाज काझी, राष्ट्र्वादी काँग्रेसच्या संजय बताले यांचा पराभव केला. नळदुर्ग नगरपालिकेत काँग्रेसचे 9 तर भाजपचे 10 व एकनाथ शिंदे यांच्या शिवसेनेचा एक उमेदवार विजयी झाला.

उमरगा नगरपालिकेसाठी महायुतीमधील एकनाथ शिंदे यांच्या शिवसेनेचे किरण गायकवाड यांनी बाजी मारली. या निवडणुकीत त्यांनी जवळपास सहा हजार मताने विजय मिळवला. त्यांनी भाजपचे हर्षवर्धन चालुक्य, ठाकरे सेनेचे रज्जाक अत्तार यांचा पराभव केला.

मुरूम नगरपालिका निवडणुकीत भाजपचे बापूराव पाटील विजयी झाले. त्यांनी याठिकाणी काँग्रेसच्या उमेदवाराचा पराभव केला. तर परंडा नगरपालिका निवडणुकीत एकनाथ शिंदेंच्या शिवसेनेचे उमेदवार झाकीर सौदागर विजयी झाले त्यांनी त्यांच्या विरोधातील भाजप, अजित पवार यांची राष्ट्रवादी काँग्रेस, काँग्रेस व उद्धव ठाकरे यांच्या आघडीचे उमेदवार विश्वजीत कदम यांचा पराभव केला. तर भूममध्ये एकनाथ शिंदे यांच्या शिवेसेनेच्या संयोगिता गाढवे विजयी झाल्या. त्यांनी विरोधातील सर्वपक्षीय उमेदवार सत्त्वशीला थोरात यांचा पराभव केला.

एकंदरीतच या नगरपालिका निवडणुकीच्या निमित्ताने धाराशिव जिल्ह्यात पुन्हा एकदा सत्ताधारी महायुतीने मोठे यश मिळवले आहे. धाराशिव जिल्ह्यात पुन्हा एकदा आमदार राणाजगजीतसिंह पाटील, माजी मंत्री तानाजी सावंत यांचा करिष्मा कायम असल्याचे स्पष्ट होत आहे. दुसरीकडे या निवडणुकीत खासदार ओमप्रकाश राजेनिंबाळकर व आमदार कैलास पाटील व आमदार प्रवीण स्वामी यांच्यासाठी हा धक्का मानला जात आहे.