Eknath Shinde on Jyoti Waghmare : ज्योती वाघमारेंना उमेदवारी, एकनाथ शिंदेंच्या एका वाक्याने जिंकलं कार्यकर्त्यांचं मन, म्हणाले, 'पक्षात...'

Eknath Shinde News : राज्यसभा निवडणुकीत उपमुख्यमंत्री एकनाथ शिंदेंनी धक्कातंत्र देत ज्योती वाघमारे यांना उमेदवारी जाहीर केली. शिवसेनेतून गजानन किर्तीकर, राहुल शेवाळे, शायना एन सी यांच्या नावाची चर्चा सुरू असताना ज्योती वाघमारे यांच्या उमेदवारीने अनेकांच्या भूवया उंचावल्या आहेत.

ज्योती वाघमारेंच्या उमेदवारीबाबत बोलताना एकनाथ शिंदे म्हणाले, आमचा शिवसेना पक्ष सर्वसामान्य कार्यकर्त्यांचा पक्ष आहे. आणि बाळासाहेब ठाकरे, आनंद दिघे यांनी सर्वसामान्य कार्यकर्त्यांना मोठं केलं. आणि तोच विचार घेऊन आम्ही पुढे चाललो आहे. त्यामुळेच ज्योतीताई वाघमारे या लाडक्या बहिणीला शिवसेनेनी संधी दिली आहे.

त्यांना देखील याची कल्पना नव्हती. परंतू शेवटी शिवसेनेत सर्व सामान्य कार्यकर्त्यांना संधी देतो. सर्वसामन्या कार्यकर्त्यांना मोठं करतो, असे देखील शिंदे म्हणाले.

ज्योतीताई पक्षाची भूमिका,काम, ध्येय धोरणं आणि गेल्या साडेतीन वर्षात केलेलं काम लोकांपर्यंत पोहोचवतील. शिवसेना राज्य आणि राष्ट्रीय पातळीवर नेण्याचं काम करतील, असा विश्वास देखील त्यांनी व्यक्त केला.

शिवसेनेत नाराजी?

उमेदवारी न मिळाल्याने शिवसेनेत नाराजी उफाळून आली आहे. माजी खासदार आनंदराव अडसूळ यांनी जाहीरपणे शब्द देऊनही आपल्या संधी मिळाली नाही, असे म्हणत नाराजी व्यक्त केली. तसेच येथून पुढे कोणावर विश्वास ठेवणार नसल्याचे म्हटले आहे.