Eknath Shinde : एकनाथ शिंदे पुन्हा नाराज? कॅबिनेटमधील 'या' कृतीमुळे चर्चाना उधाण

Mumbai News : राज्यात नुकत्याच झालेल्या विधानसभा निवडणुकीत महायुतीने एक हाती विजय मिळवला. त्यानंतर राज्यात 5 डिसेंबरला मुख्यमंत्री म्हणून देवेंद्र फडणवीस यांनी तर उपमुख्यमंत्री म्हणून एकनाथ शिंदे व अजित पवार यांनी शपथ घेतली. त्यानंतर राज्य मंत्रिमंडळाचा विस्तारही झाला. मात्र, सरकार स्थापन करण्यापासून ते आतापर्यंत महायुतीमध्ये सर्व काही आलबेल असल्याचे दिसत नाही.

भाजप, शिवसेना शिंदे गट व राष्ट्रवादी काँग्रेस अजित पवार गटामध्ये या-ना त्या कारणावरून नाराजी असल्याचे पुढे येत आहे. उपमुख्यमंत्री एकनाथ शिंदे (Eknath Shinde ) मंगळवारी झालेल्या राज्य मंत्रिमंडळाच्या बैठकीस प्रत्यक्ष उपस्थित राहिले नाहीत. या बैठकीस ते व्हिडिओ कॉन्फरसिंगद्वारे उपस्थित राहिल्याने पुन्हा एकदा राजकीय वर्तुळात शिंदे नाराज असल्याच्या चर्चां जोरात रंगल्या आहेत.

महायुतीची सत्ता राज्यात आल्यापासून एकनाथ शिंदे यांची नाराजी लपून राहिलेली नाही. महायुतीचे सरकार स्थापन होण्यापूर्वी एकनाथ शिंदे नाराज असल्याची चर्चा होती. त्यानंतर शिंदे यांनी ठाण्यातील निवासस्थानी पत्रकार परिषद घेत मुख्यमंत्रीपदाबाबतचा दावा सोडत या वादावर पडदा टाकला होता. त्यानंतर खातेवाटपावरून नाराजी दर्शवली होती. शपथविधीच्या काही तास अगोदरपर्यंत भाजप-सेनेतील चर्चा सुरु होती. त्यानंतर महायुतीत पालकमंत्रीपद वाटपाबाबतही दुजाभाव झाल्याची भावना काही शिवसैनिकांकडून व्यक्त केली. रायगडमध्ये तर मोठा वाद उफाळून आलेला बघायला मिळाला. त्यामुळे या सगळ्या घडामोडींमधूनच एकनाथ शिंदे हे नाराज असल्याची चर्चा जोरात रंगली आहे.

राज्य मंत्रिमंडळाची बैठक मंगळवारी पार पडली. या नाराजीतून उपमुख्यमंत्री एकनाथ शिंदे या बैठकीसाठी मंत्रालयात प्रत्यक्ष उपस्थित न राहता व्हिडीओ कॉन्फरन्सिंगद्वारे उपस्थितत राहिल्याची चर्चा आहे. एकनाथ शिंदे यांच्या मंत्रिमंडळ बैठकीतील प्रत्यक्ष अनुपस्थितीवर शिवसेनेचे (Shivsena) मंत्री शंभूराज देसाई आणि भाजपचे मंत्री चंद्रशेखर बावनकुळे यांनी प्रतिक्रिया दिली आहे.

एकनाथ शिंदे हे नाराज नाहीत. मुख्यमंत्री देवेंद्र फडणवीस आणि एकनाथ शिंदे यांच्यात चर्चा झाली आहे. काही पूर्वनियोजित कार्यक्रमांमुळे एकनाथ शिंदे राज्य मंत्रिमंडळाच्या बैठकीला प्रत्यक्षपणे उपस्थित राहू शकले नाहीत. पण ते व्हिसीद्वारे उपस्थित राहिले. ते नाराज नाहीत असे मंत्री शंभूराज देसाई म्हणाले. एकनाथ शिंदे नाराज नाहीत. ते माझ्यासोबत बोलले होते. त्यांना ठाण्याहून येण्याकरता थोडा वेळ लागला. त्यामुळे ते स्वत:हून मुख्यमंत्री देवेंद्र फडणवीस यांना म्हणाले की, तुम्ही बैठक सुरु करा, असे मंत्री चंद्रशेखर बावनकुळे यांनी स्पष्ट केले.