Ratnagiri News : तीन वर्षांपूर्वी ठाकरे यांच्या शिवसेनेचे नेते अनिल परब यांनी दापोली नगरपंचायतीच्या राजकारणात आपले वजन वापरत योगेश कदम यांना बाहेरचा रस्ता दाखवला होता. दापोली नगरपंचायतीच्या राजकारणात त्यांना प्रवेशच दिला नव्हता. त्यावेळी कदम यांना आपला अपमान झाल्याचे वाटलं होतं. यावरूनच त्यांच्या मनात नाराजी होती. कोणत्याही परिस्थितीत येथे सत्तापालट करायचा अशी त्यांनी भीष्म प्रतिज्ञा केली होती. ती अखेर आज त्यांनी सत्यात उतरवत अनिल परबांसह उद्धव ठाकरेंना धक्का दिला आहे. येथे जेष्ठ महिला नगरसेविका कृपा घाग यांची दापोली नगराध्यक्षपदी बिनविरोध नियुक्ती केली आहे. यामुळे ठाकरे यांच्या शिवसेनेला येथे धक्का बसल्याचे बोलले जात आहे.
राज्यात सर्वोच्च न्यायाल्याच्या निकालानंतर स्थानिकच्या निवडणुकीस वेग आला असून राजकीय पक्षांनी मोर्चे बांधणीला सुरूवात केली आहे. त्यापार्श्वभूमिवर रत्नागिरीतही शिंदे शिवसेना आणि भाजप तयारीला लागली आहे. अशातच योगेश कदम यांनी दापोली नगरपंचायतीत सत्तापालट करण्याचा करिश्मा केला आहे. यामुळे आगामी स्थानिकच्या आधीच शिवसेनाला जिल्ह्यात मोठे बळ मिळाले आहे.
दापोली नगरपंचायतीत नगराध्यक्षपदाची निवडणुक प्रक्रिया सुरू झाली होती. तर 22 मे रोजी शिंदे गट शिवसेनेच्या कृपा घाग यांनी आपला उमेदवारी अर्ज दाखल केला होता. जो एकमेव होता. आज (ता. 29) त्यांची बिनविरोध निवड झाली. नगराध्यक्षपदासाठी घाग यांच्या नावावर आज शिक्कामोर्तब झाला आहे. तर दापोली नगरपंचायतीवर तीन वर्षांनंतर पुन्हा शिवसेनेचा भगवा पडकला आहे. तर घाग या समाजाभिमुख, कर्तबगार व सजग नेत्या म्हणून परिचित आहेत. घाग यांच्या नियुक्तीनंतर ढोल-ताशांच्या गजरात आणि फटाक्यांच्या आतषबाजीत कार्यकर्त्यांनी जल्लोष केला.
राज्यमंत्री योगेश कदम यांनी दापोली नगरपंचायतीवर भगवा फडकविणारच, असे काही महिन्यांपूर्वी जाहीर केले होते. त्यानंतर दापोलीतील सत्ताधाऱ्यांमध्ये फुटीचे राजकारण सुरू झाले. शिवसेनेचा एक गट फोडत त्यांनी तत्कालीन नगराध्यक्ष ममता मोरे यांना एकटे पाडले. त्यांच्यावर अविश्वास आणत आज दापोली नगरपंचायतीत सत्ता काबीज करण्याची यशस्वी राजकीय खेळीही मंत्री कदम यांनी केली. त्यामुळे दापोली शहरावर पुन्हा एकदा शिवसेनेचेच वर्चस्व निर्माण झाले आहे.
यानंतर जनतेच्या हितासाठी सकारात्मक, पारदर्शक आणि विकासाभिमुख कारभार करणार असून, दापोलीचा सर्वांगीण विकास हेच आपले प्रमुख ध्येय राहील अशी प्रतिक्रिया नगराध्यक्षा कृपा घाग यांनी दिली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.