Assembly Elections : विधान परिषदेच्या भाजप आमदाराची विधानसभेच्या एन्ट्रीची चर्चा; बावनकुळेंच्या सूतोवाचाने राजकीय चर्चांना वेग

Raigad News : वसंत जाधव

विधान परिषदेतील दोन वर्षांचा कार्यकाळ पूर्ण करताना आमदार विक्रांत पाटील यांनी जनसेवेचा संकल्प पुन्हा एकदा अधोरेखित केला आहे. राज्यपाल नियुक्त सदस्य म्हणून भारतीय जनता पार्टी युवा मोर्चाच्या माध्यमातून काम करत वरिष्ठ सभागृहात पोहोचलेल्या आ. पाटील यांनी या दोन वर्षांत पनवेलच्या प्रश्नांना प्राधान्य दिल्याचे त्यांच्या समर्थकांकडून सांगितले जाते. आता त्यांच्या राजकीय वाटचालीची पुढील दिशा काय असेल, याबाबत पनवेलच्या राजकीय वर्तुळात चर्चा सुरू झाली आहे.

भविष्यात लोकसंख्येच्या आधारावर पनवेलमध्ये दोन विधानसभा मतदारसंघ निर्माण झाले, तर त्यापैकी एका मतदारसंघातून भाजपच्या कमळ चिन्हावर निवडणूक लढविण्याची संधी ते शोधतील का, याकडे राजकीय निरीक्षकांचे लक्ष लागले आहे. त्यांनी अद्याप याबाबत अधिकृत घोषणा केलेली नसली, तरी विक्रांत पाटील यांच्या वाढदिवसानिमित्त मंत्री चंद्रशेखर बावनकुळे यांनी आगामी विधानसभा निवडणुकीबाबत केलेले सुतोवाच आणि विधान परिषदेतील कामकाजातून पनवेलशी असलेले त्यांचे राजकीय नाते ठळकपणे समोर आले आहे.

आमदार विक्रांत पाटील यांनी समाजमाध्यमांवर पोस्ट प्रसिद्ध करून आपल्या दोन वर्षांच्या कार्यकाळाबद्दल भावना व्यक्त केल्या. दोन दशकांहून अधिक काळ सामाजिक आणि राजकीय क्षेत्रात कार्यरत असताना सर्वसामान्यांचे प्रश्न सोडविण्याचा प्रयत्न केला. या प्रवासात नागरिकांचे प्रेम, कार्यकर्त्यांची साथ आणि हितचिंतकांचे आशीर्वाद हीच आपली ताकद राहिली, अशी भावना त्यांनी व्यक्त केली.

मुख्यमंत्री देवेंद्र फडणवीस, महसूल मंत्री चंद्रशेखर बावनकुळे, भाजपचे प्रदेशाध्यक्ष रवींद्र चव्हाण आणि पक्षातील वरिष्ठ नेतृत्वाने दाखविलेल्या विश्वासामुळे विधिमंडळात जनतेचे प्रश्न मांडण्याची संधी मिळाल्याचे त्यांनी नमूद केले. आमदारकी हे केवळ पद नसून जनतेच्या विश्वासाचे ऋण फेडण्याची जबाबदारी असल्याचे सांगत, आगामी काळातही अधिक जोमाने जनसेवेत कार्यरत राहण्याचा निर्धार त्यांनी व्यक्त केला.

पनवेलच्या प्रश्नांना वरिष्ठ सभागृहात वाचा!

राज्यपाल नियुक्त सदस्य असले तरी आमदार विक्रांत पाटील यांच्या दोन वर्षांच्या कारकिर्दीचे वैशिष्ट्य म्हणजे पनवेल आणि परिसरातील प्रश्नांवर त्यांनी दिलेला भर. पनवेलमध्ये झपाट्याने वाढणारी लोकसंख्या, पाणीपुरवठ्याची समस्या, नागरी सुविधांवरील ताण, रस्ते आणि वाहतूक व्यवस्था, तसेच नियोजनबद्ध विकासाची गरज यांसारखे विषय स्थानिक पातळीवर सातत्याने चर्चेत आहेत. अशा प्रश्नांना राज्याच्या विधिमंडळात स्थान मिळवून देण्याचे काम त्यांनी केले आहे. वरिष्ठ सभागृहात त्यांनी पनवेलशी संबंधित सर्वाधिक प्रश्न मांडले. त्यामुळे स्थानिक प्रश्नांना राज्यस्तरावर वाचा फोडणारा चेहरा म्हणून त्यांची ओळख निर्माण झाली आहे. विधान परिषदेत मिळालेल्या संधीचा उपयोग करून स्थानिक प्रश्न शासनदरबारी नेणे, हा त्यांच्या राजकीय वाटचालीतील महत्त्वाचा भाग ठरला आहे.

विधान परिषदेपासून विधानसभेपर्यंतचा प्रवास?

राज्यपाल नियुक्त सदस्य म्हणून विधान परिषदेत प्रवेश केल्यानंतर विक्रांत पाटील यांना राज्याच्या वरिष्ठ सभागृहात काम करण्याची संधी मिळाली. मात्र, राजकारणात दीर्घकालीन स्थान निर्माण करण्यासाठी स्थानिक जनाधार, संघटनात्मक ताकद आणि निवडणुकीतील सहभाग यांना विशेष महत्त्व असते. या पार्श्वभूमीवर त्यांच्या पुढील राजकीय वाटचालीबाबत चर्चा होणे स्वाभाविक आहे.

पनवेलच्या लोकसंख्येत सातत्याने वाढ होत असून, भविष्यात मतदारसंघांची पुनर्रचना झाल्यास या परिसरातील विधानसभा मतदारसंघांची रचना बदलण्याची शक्यता राजकीय चर्चेत व्यक्त केली जात आहे. लोकसंख्येच्या आधारावर पनवेलमध्ये दोन विधानसभा मतदारसंघ निर्माण झाले, तर भाजपसमोरही नव्या राजकीय समीकरणांचा विचार करण्याची संधी निर्माण होऊ शकते. अशा परिस्थितीत विक्रांत पाटील यांच्यासाठी विधानसभेची निवडणूक हा पुढील राजकीय टप्पा ठरू शकतो, अशी चर्चा आहे. मात्र, मतदारसंघांची पुनर्रचना, त्यातून निर्माण होणारी प्रत्यक्ष रचना, भाजपची उमेदवारी आणि निवडणूक लढविण्याचा त्यांचा निर्णय या सर्व बाबी भविष्यातील घडामोडींवर अवलंबून आहेत.

जनसेवेच्या दाव्यांची कसोटी आगामी काळात

दोन वर्षांचा कार्यकाळ पूर्ण झाल्यानिमित्त व्यक्त केलेल्या भावना आणि जनतेच्या प्रश्नांसाठी काम करण्याचा निर्धार यातून विक्रांत पाटील यांनी आपली राजकीय भूमिका स्पष्ट केली आहे. कार्यकर्त्यांची साथ, नागरिकांचा विश्वास आणि पक्षाच्या वरिष्ठ नेतृत्वाचे पाठबळ या गोष्टींचा उल्लेख करत त्यांनी पुढील काळातही जनसेवा सुरू ठेवण्याचा संकल्प व्यक्त केला आहे.

पनवेलमध्ये राजकीय स्पर्धा आणि विकासाच्या अपेक्षा दोन्ही वाढत असताना स्थानिक प्रश्नांवर सातत्याने काम करणाऱ्या नेतृत्वाला महत्त्व प्राप्त होते. विधान परिषदेतून पनवेलचे प्रश्न मांडण्याची भूमिका पुढे नेताना ते स्थानिक पातळीवर संघटनात्मक संपर्क किती वाढवतात, नागरिकांच्या समस्यांवर किती ठोस पाठपुरावा करतात आणि पक्षातील राजकीय समीकरणांमध्ये आपले स्थान कसे मजबूत करतात, याकडे लक्ष राहणार आहे.

विधान परिषदेतील दोन वर्षांचा टप्पा हा विक्रांत पाटील यांच्या राजकीय प्रवासातील एक महत्त्वाचा पडाव आहे. आता या अनुभवाचे रूपांतर अधिक व्यापक जनाधारात करण्याचे आव्हान त्यांच्यासमोर असेल. पनवेलच्या प्रश्नांना विधिमंडळात प्राधान्य देणारे आमदार म्हणून पुढे जाताना भविष्यात विधानसभेच्या राजकारणातही ते सक्रिय भूमिका घेणार का, याचे उत्तर आगामी राजकीय घडामोडींमध्ये मिळेल. तूर्तास, दोन वर्षांच्या कार्यकाळानिमित्त व्यक्त केलेल्या कृतज्ञतेच्या भावनेसह त्यांच्या पुढील राजकीय वाटचालीबाबतच्या चर्चांनाही पनवेलमध्ये सुरुवात झाली आहे.