Vidhan Parishad Election : विधानपरिषद निवडणुकीत महाविकास आघाडीवर 10 मतदारसंघात नामुष्की : मुख्य उमेदवारांनीच तोंडावर पाडलं; गेमच पालटल्याने महायुती विजयाच्या उंबरठ्यावर

Mumbai News : राज्यातील विधानपरिषदेच्या 17 जागेसाठी निवडणूक होत आहे. गुरुवारी उमेदवारी अर्ज मागे घेण्याचा शेवटचा दिवस आहे. त्यामुळे निवडणुकीच्या रिंगणातून कोण-कोण माघार घेणार याची उत्सुकता लागली होती. विधानपरिषदेच्या निवडणूक रिंगणातून १७ पैकी दहा ठिकाणी महाविकास आघाडीचे अधिकृत उमेदवार निवडणूक रिंगणात नसल्याने मतदानाआधीच महायुतीचे पाच जण बिनविरोध निवडून आले आहेत. त्यामध्ये महायुतीमधील पक्षनिहाय पहिले तर भाजपचा एक, एकनाथ शिंदेच्या शिवसेनेचे दोन तर अजित पवार यांच्या राष्ट्रवादी काँग्रेसचे दोघे जण बिनविरोध विजयी झाले.

विधान परिषदेच्या या दहा मतदारसंघांतील प्रमुख उमेदवारांच्या माघारीनंतर गेमच पालटला असून यापैकी पाच ठिकाणी महायुतीने गुलाल उधळला आहे. तर दुसरीकडे नाशिक, अहिल्यानगर, सोलापूर, छत्रपती-संभाजीनगर-जालना, भंडारा-गोंदिया या विधानपरिषदेच्या मतदारसंघातून महाविकास आघाडीचा अधिकृत उमेदवार नसल्याने महायुतीसाठी ही निवडणूक एकतर्फी झाली आहे.

विधानपरिषदेच्या निवडणुकीसाठी गुरुवारी उमेदवारी अर्ज मागे घेण्याचा शेवटचा दिवस होता. त्यामुळे निवडणूक रिंगणातून कोण माघार घेणार याची उत्सुकता शिगेला पोहचली असतानाच महाविकास आघाडीच्या या उमेदवारांच्या माघारींमुळे सहा मतदारसंघातील निवडणूक बिनविरोध झाली आहे.

त्यामध्ये ठाणे, रायगड-रत्नागिरी-सिंधूदुर्ग, यवतमाळ, वर्धा, पुणे या मतदारसंघाचा समावेश आहे. या पाच मतदारसंघासोबतच नाशिक, अहिल्यानगर, सोलापूर, छत्रपती-संभाजीनगर-जालना, भंडारा-गोंदिया या विधानपरिषदेच्या मतदारसंघातून महाविकास आघाडीचा अधिकृत उमेदवार नाही. मात्र याठिकाणी अपक्ष उमेदवार रिंगणात असल्याने येत्या काळात लढत होणार आहे.

आघाडीच्या जागावाटपात नाशिकचा मतदारसंघ उद्धव ठाकरे यांच्या शिवसेनेच्या (Shivsena) वाट्याला आला होता. याठिकाणी माजी आमदार अनिल कदम यांना उमेदवारी अर्ज भरण्यासाठी एबी फॉर्म देखील दिला होता. मात्र, त्यांनी त्याठिकाणी उमेदवारी अर्ज वेळेत भरला नाही. त्यामुळे याठिकाणी महायुतीसाठी संपूर्ण मैदान मोकळे दिसत आहे. याठिकाणी आघाडीला अपक्ष उमेदवाराला पाठिंबा देऊन आखाडयात उतरविण्याची नामुष्की ओढावली आहे. त्यामुळे महायुतीसाठी ही लढत एकतर्फी ठरणार आहे.

सोलापूर विधानपरिषदेच्या रिंगणातून काँग्रेसचे अधिकृत उमेदवार आदित्य फत्तेपूरकर यांचा अर्ज छाननीत बाद ठरवण्यात आला फत्तेपूरकर यांच्या अर्जावर सूचक असलेले पंढरपूरचे नगरसेवक नागेश भोसले यांनी, 'ती सही आपली नसून बनावट आहे,' असे स्वयंघोषणापत्र निवडणूक निर्णय अधिकाऱ्यांना दिले. यामुळे आवश्यक सूचकांची संख्या कमी झाल्याने हा अर्ज रद्द करण्यात आला. त्यामुळे महाविकास आघाडीकडून डमी म्हणून अर्ज भरलेले राष्ट्रवादी काँग्रेस शरदचंद्र पवार पक्षाचे सोलापूर जिल्हाध्यक्ष वसंतराव देशमुख यांना आता महाविकास आघाडीचे अधिकृत उमेदवार म्हणून मैदानात उतरवण्यात आले आहे. त्यामुळे महायुतीचे संख्याबळ अधिक असलेल्या या मतदारसंघात महाविकास आघाडीचे आव्हान संपुष्टात आले आहे. त्यामुळे याठिकाणी महायुती विजयाच्या उंबरठ्यावर आहे.

अहिल्यानगर मतदारसंघात महाविकास आघाडीला अधिकृत उमेदवार मिळाला नाही. याठिकाणी अपक्ष उमेदवाराला महाविकास आघाडीने अपक्ष करण ससाणे या काँग्रेस बंडखोर उमेदवाराला पाठिंबा दिला आहे. मात्र, त्यांनी निवडणूक रिंगणातून माघार घेतली आहे. त्यामुळे याठिकाणी महायुतीचे उमेदवार प्राजक्त तनपुरे यांच्या विरोधात अपक्ष उमेदवार निवडणूक रिंगणात असणार आहेत.

याठिकाणी आघाडीच्या उमेदवारानी घेतली माघार :

भंडारा-गोंदिया - दिलीप बनसोड (काँग्रेस) माघार.

औरंगाबाद जालना - देवयानी कृष्णा पाटील डोणगावकर (शिवसेना उद्धव बाळासाहेब ठाकरे) माघार.

सोलापूर - आदित्य फत्तेपूरकर (काँग्रेस) अर्ज बाद.

अहिल्यानगर - करण ससाणे (काँग्रेस बंडखोर) माघार

नाशिक - शिवसेना उद्धव बाळासाहेब ठाकरे पक्षाकडून अनिल कदम यांना उमेदवारी जाहीर झाली होती. मात्र त्यांनी अर्जच दाखल केला नाही.

या 12 मतदारसंघात होणार लढत :

राज्यातील नाशिक, जळगाव, छत्रपती संभाजीनगर-जालना, परभणी-हिंगोली, नांदेड, धाराशिव-बीड-लातूर, सोलापूर, अहिल्यानगर, सातारा-सांगली, नागपूर, अमरावती, गोंदिया-भांडारा या विधानपरिषदेच्या मतदारसंघात निवडणूक होणार आहे.