Maharashtra municipal elections: अखेर सर्व 29 महापालिकांमध्ये महापौर विराजमान : मुंबईसह सर्वाधिक महापालिकांवर भाजपचा झेंडा : शिंदे, ठाकरे, काँग्रेसच्या वाट्याला किती?

Mumbai News : राज्यातील गेल्या चार वर्षांपासून रखडलेल्या स्थानिक स्वराज्य संस्थेच्या निवडणुकीला या वर्षाच्या सुरुवातीलाच मुहूर्त लागला होता. पहिल्या टप्प्यात राज्यातील 288 नगरपालिका व नागरपंचायतीच्या निवडणुका पार पडल्यानंतर 29 महापालिका निवडणुकीचा बार उडाला. त्यानंतर गेल्या महिनाभरात सर्वच ठिकाणी महापौर विराजमान झाले आहेत. त्यामुळे आता सर्वच महापालिकेतील चित्र स्पष्ट झाले आहे. त्यानुसार आता सर्वाधिक 20 महापालिकेवर भाजपचा झेंडा फडकला. तर दुसरीकडे एकनाथ शिंदे यांच्या शिवसेनेचे तीन तर अजित पवार यांच्या राष्ट्रवादी काँग्रेसचा एक असे महायुतीचे 24 महापौर निवडून आले आहेत. विरोधी पक्षाचे केवळ पाच ठिकाणी महापौर निवडून आले आहेत.

राज्यातील 29 महानगरपालिकांची निवडणूक पार पडली. काही ठिकाणी महापौर निवडीवेळी शेवटच्या क्षणापर्यंत मोठी रस्सीखेच पाहावयास मिळाली. शेवटच्या टप्प्प्यात झालेल्या महापौर पडलाय निवडीत ऐनवेळी एकामताने चंद्रपूर महापालिकेत भाजपचा महापौर झाला तर भिवंडीत काँग्रेसच्या पाठींब्यावर भाजपचा (BJP) बंडखोर महापौर झाला आहे. शेवटच्या क्षणापर्यत त्यामुळे उत्सुकता शिगेला पोहचली होती.

राज्यातील सर्व महापालिकांमधील महापौरपदाची निवड झाली असून, सर्वाधिक 20 महापौर हे भाजपचे निवडून आले आहेत. शिवसेना (Shivsena) शिंदे गटाचे तीन तर अजित पवार यांच्या राष्ट्रवादी काँग्रेसचा एक असे महायुतीचे 24 महापौर निवडून आले तर काँग्रेस व ठाकरे गटाला प्रत्येकी एक महापौरपद मिळाले आहे. तर भिवंडीत काँग्रेसच्या मदतीने भाजप बंडखोर महापौर झाला तर वसईत हितेंद्र ठाकूर यांचा बहुजन विकास आघाडी व मालेगावमध्ये इस्लाम पार्टीचा महापौर झाला आहे.

एकनाथ शिंदेंचा पक्ष ठाण्यातच मर्यादित

महानगरपालिका निवडणुकीत उपमुख्यमंत्री एकनाथ शिंदे यांच्या शिवसेनेने राज्यात दुसरा क्रमांक पटकविला. ठाणे, कल्याण-डोंबिवली, उल्हासनगर अशा ठाणे जिल्ह्यातील तीन महानगरपालिकांमध्ये शिंदे यांच्या शिवसेनेचे महापौर निवडून आले. शिंदे गटाला राज्यात अन्यत्र कुठेही महापौरपद मिळालेले नाही. भिवंडीत सत्तेसाठी अंकगणित जुळवून आणण्याचा शिंदे प्रयत्न करीत असताना भाजपने त्यात खो घातल्याचा आरोप शिंदे गटाकडून होत आहे. तर महायुतीमधील मैत्र पक्ष असलेल्या अजित पवार यांच्या राष्ट्रवादी काँग्रेसला अहिल्यानगरचे महापौरपद मिळाले आहे.

दुसरीकडे विरोधी पक्षातील काँग्रेसचा लातूरमध्ये महापौर विराजमान झाला. चंद्रपूर व भिवंडीमध्ये सर्वाधिक जागा मिळूनही काँग्रेसला महापौरपद मिळू शकले नाही. चंद्रपूरमध्ये ठाकरे यांच्या शिवसेनेने काँग्रेसला धक्का दिला. पण परभणीमध्ये ठाकरे यांच्या शिवसेनेला मदत करून काँग्रेसने आघाडीचा धर्म पाळला.

राज्यात नुकत्याच पार पडलेल्या नगरपालिका निवडणुकीत भाजपचे सर्वाधिक नगराध्यक्ष निवडून आले होते. यापाठोपाठ सर्वाधिक महापौर भाजपचे निवडून आले आहेत. नुकत्याच पार पडलेल्या 12 जिल्हा परिषदांमध्येही अधिक अध्यक्षपदे जिंकण्यासाठी भाजपने आतापासूनच जोर लावला आहे. त्यामुळे आता सर्वाधीक जिल्हा परिषदेवर कोणाचे वर्चस्व असणार याची उत्सुकता शिगेला पोंहचली आहे.

पक्षनिहाय महापौर निवडून आलेल्या महानगरपालिका पुढीलप्रमाणे :

भाजप : मुंबई, नवी मुंबई, नागपूर, पुणे, पिंपरी-चिंचवड, सोलापूर, कोल्हापूर, छत्रपती संभाजीनगर, अकोला, अमरावती, चंद्रपूर, जालना, इचलकरंजी, नाशिक, धुळे, जळगाव, मीरा-भाईंदर, पनवेल, नांदेड-वाघाळा, सांगली-मिरज-कुपवाड, एकनाथ शिंदेची शिवसेना : ठाणे, कल्याण-डोंबिवली, उल्हासनगर, राष्ट्रवादी अजित पवार : अहिल्यानगर, काँग्रेस : लातूर, उद्धव ठाकरेंची शिवसेना : परभणी, बहुजन विकास आघाडी : वसई, इस्लाम पार्टी : मालेगाव, भाजप बंडखोर : भिवंडी-निजामपूर.