BJP Nominated Corporator : सोलापूर भाजपच्या बहुचर्चित स्वीकृत नगरसेवकांची नावे जाहीर; शहराध्यक्षांसह पाच निष्ठावंतांना संधी

Solapur, 20 February : सोलापूर महापालिकेच्या बहुचर्चित स्वीकृत नगरसेवकाची यादी आज (ता. 20 फेब्रुवारी) जाहीर झाली. त्यातही भाजपच्या वाट्याला आलेल्या नऊपैकी आठ जणांची नावे जाहीर केली. यात शहराध्यक्ष रोहिणी तडवळकर यांच्यासह भाजप आणि संघ परिवारामधून आलेल्या पाच निष्ठावंतांसह काही माध्यम प्रतिनिधींनाही पक्षकडून संधी देण्यात आली आहे. एमआयएमकडून नय्यूम सालार यांची नेमणूक करण्यात आली आहे. भाजपने नऊपैकी आठच नावे जाहीर केल्याने पहिल्याच सर्वसाधारण सभेत प्रचंड गोंधळ झाला आणि गोंधळताच सभा तहकूब करण्याची वेळ भाजपवर आली.

सोलापूर महापालिकेच्या (Solapur Corporation) १०२ जागांपैकी भारतीय जनता पक्षाने ऐतिहासिक कामगिरी करत तब्बल ८७ जागा जिंकल्या आहेत. त्यांच्यासोबत राष्ट्रवादी गेल्यानेत त्यांच्या सभागृहात महापालिकेत दहा जागा स्वीकृत नगरसेवक म्हणून भरता येणार होत्या. त्या १० जागांसाठी भाजप आणि एमआयएम पक्षाकडून तब्बल ६२ अर्ज आले होते.

भाजपच्या (BJP) वाट्याला नऊ, तर एमआयएमला संख्याबळाच्या आधारे एक जागा मिळणार होती. त्यानुसार आज महापालिकेच्या सर्वसाधारण सभेत दहा जणांची नावे जाहीर होणे अपेक्षित होते. मात्र, केवळ नऊजणांची नावे या सभेत जाहीर झाली. त्यामुळे शिवसेना आणि काँग्रेसच्या नगरसेवकांनी सर्वच नावे जाहीर करण्याच्या मागणीवरून गोंधळ घातला, त्यामुळे भाजपला कामकाज तहकूब करावे लागले.

भारतीय जनता पक्षाकडून शहराध्यक्ष रोहिणी तडळवकर, रुद्रेक्ष बोरामणी, ज्ञानेश्वर म्याकल, श्रीनिवास दायमा, अक्षय अंजिखाने ह्यांना भाजप आणि संघ परिवारातील निष्ठावंतांना संधी देण्यात आली आहे. गेल्या काही वर्षांपासून पक्षासोबत असलेल्या वृषाली चालुक्य आणि मोची समाजातील ऋषिकेश म्हेत्रे, तसेच माध्यम प्रतिनिधी म्हणून मनीष केत यांनाही भाजपनेही स्वीकृत नगरसेवक म्हणून काम करण्याची संधी दिली आहे.

भारतीय जनता पक्षाकडून नऊच्या ऐवजी आठ जणांची नावे जाहीर केली आहे, त्यामुळे सभेत प्रचंड गोंधळ झाला. शिवसेनेचे गटनेते अमोल शिंदे आणि काँग्रेसचे गटनेते चेतन नरोटे यांनी उर्वरीत एक नाव जाहीर करण्यासाठी महापौरांच्या आसनासमोर धाव घेतली. त्या गोंधळातच महापौर विनायक कोंड्याल यांनी सभागृहाचे कामकाज स्थगित केले.

दरम्यान, स्वीकृत नगरसेवकपदासाठी भारतीय जनता पक्षाच्या एका इच्छुकाने आपल्याला मेसेज केला आहे. त्यात त्यांनी बालाजी सरोवरमध्ये सध्या उपस्थित असलेल्या काही नेत्यांची आणि आमदाराचे नाव लिहून आपण आत्महत्या करणार आहोत, असे मेसेज म्हटले आहे, असा धक्कादायक दावा नगरसेवक अमोल शिंदे यांनी केला आहे. त्यामुळे सभागृहात एकच खळबळ उडाली.

एमआयएमकडून नय्यूम सालारांना संधी

एमआयएमकडून नय्यूम सालार यांना पक्षाने संधी दिली आहे. त्यांना एमआयएम पक्षाचे अध्यक्ष असदुद्दीन ओवैसी यांनी निवडणुकीच्या काळातच शब्द दिला होता, त्यानुसार एमआयएमकडून सालार यांची नियुक्ती स्वीकृत नगरसेवकपदी करण्यात आली आहे.