Shivsena News: 'छत्रपती संभाजीनगरमधून आंतरराष्ट्रीय विमानसेवा सुरू करा...', खासदार भुमरेमामांनी थेट अमित शहांनाच घातलं साकडं

Shivsena News : महाराष्ट्राची पर्यटन राजधानी म्हणून ओळखल्या जाणाऱ्या छत्रपती संभाजीनगरमधून आंतरराष्ट्रीय विमानसेवा सुरू करण्याची मागणी गेल्या अनेक वर्षांपासून होत आहे. ही सेवा उपलब्ध नसल्याने संभाजीनगरसह मराठवाड्यातील पर्यटन व्यवसाय, उद्योग क्षेत्रालाही मोठा फटका बसत आहे.

शिवसेनेचे खासदार संदीपान भुमरे यांनी या पार्श्वभूमीवर दिल्लीत थेट केंद्रीय गृहमंत्री अमित शाह यांची भेट घेऊन त्यांना आंतरराष्ट्रीय विमानसेवा सुरू करण्यासाठी साकडे घातले. लोकसभेतील शिवसेनेचे गटनेते खासदार श्रीकांत शिंदे यांच्यासोबत त्यांनी नुकतीच शाह यांची भेट घेतली. मराठवाड्यात संदीपान भुमरे हे एकमेव महायुतीचे खासदार निवडून आले आहेत. त्यामुळे त्यांच्या मागणीला यश मिळते का? हे पाहणे महत्त्वाचे ठरणार आहे.

मराठवाड्याच्या औद्योगिक, पर्यटन आणि आर्थिक विकासाला मोठी चालना देण्यासाठी छत्रपती संभाजीनगर विमानतळावर तातडीने ‘इमिग्रेशन चेकपोस्ट’ (ICP) घोषित करून आंतरराष्ट्रीय विमानसेवा सुरू करण्यास मंजुरी द्यावी, अशी मागणी संदिपान भूमरे यांनी अमित शहा यांच्याकडे केली.

यासंदर्भात गृहमंत्र्यांना पत्र देऊन छत्रपती संभाजीनगर विमानतळाच्या आंतरराष्ट्रीय दर्जाच्या सुविधांकडे केंद्र सरकारचे लक्ष भुमरे यांनी वेधण्याचा प्रयत्न केला आहे. छत्रपती संभाजीनगर हे मराठवाड्याचे प्रमुख आर्थिक, औद्योगिक आणि आंतरराष्ट्रीय पर्यटन केंद्र असून, अजंठा-वेरूळ लेणी, देवगिरी किल्ला, बीबी का मकबरा यांसारख्या ऐतिहासिक आणि जागतिक पर्यटनस्थळांमुळे देश-विदेशातून मोठ्या संख्येने पर्यटक येथे येतात.

मात्र, थेट आंतरराष्ट्रीय विमानसेवा उपलब्ध नसल्याने विदेशी पर्यटक, उद्योजक, गुंतवणूकदार आणि व्यावसायिकांना मुंबई अथवा दिल्लीमार्गे प्रवास करावा लागतो. छत्रपती संभाजीनगर परिसरात ऑटोमोबाईल, इलेक्ट्रॉनिक्स, फार्मास्युटिकल्स, खाद्यप्रक्रिया यांसह विविध औद्योगिक क्षेत्रांचा विस्तार होत असून विदेशी गुंतवणुकीलाही मोठी संधी निर्माण झाली आहे.

अशा परिस्थितीत थेट आंतरराष्ट्रीय हवाई संपर्क उपलब्ध झाल्यास उद्योग, व्यापार, पर्यटन आणि गुंतवणुकीला मोठी गती मिळू शकते, असे खासदार भूमरे यांनी पत्रात नमूद केले आहे. छत्रपती संभाजीनगर विमानतळावर आंतरराष्ट्रीय विमानसेवेसाठी आवश्यक पायाभूत सुविधा उपलब्ध असून ब्युरो ऑफ इमिग्रेशनकडून विमानतळाची पाहणी पूर्ण झाल्याचे खासदार भूमरे यांनी शहा यांच्या निदर्शनास आणून दिले.

आंतरराष्ट्रीय विमानसेवा सुरू करण्यास इच्छुक असलेल्या विमान कंपन्यांसाठी आवश्यक असलेल्या प्रक्रियेत केंद्रीय गृह मंत्रालयाकडून इमिग्रेशन चेकपोस्ट (ICP) ची अधिकृत मंजुरी महत्त्वाची असून, ही मंजुरी प्रलंबित असल्याने आंतरराष्ट्रीय विमानसेवा सुरू करण्यास अडथळा निर्माण होत असल्याचे त्यांनी पत्रात म्हटले आहे.

पर्यटनाला चालना मिळेल..

छत्रपती संभाजीनगर विमानतळावरून थेट आंतरराष्ट्रीय विमानसेवा सुरू झाल्यास मराठवाड्यातील पर्यटन क्षेत्राला मोठा फायदा होणार आहे. अजंठा-वेरूळसह ऐतिहासिक, धार्मिक आणि सांस्कृतिक पर्यटनस्थळांना भेट देणाऱ्या विदेशी पर्यटकांची संख्या वाढण्याची शक्यता असून, पर्यटनाशी संबंधित हॉटेल, वाहतूक, मार्गदर्शक, हस्तकला, खाद्यपदार्थ आणि सेवा क्षेत्रात रोजगाराच्या मोठ्या संधी निर्माण होतील.

मराठवाड्यातील उद्योगांना जागतिक बाजारपेठेशी थेट जोडण्यासाठी आंतरराष्ट्रीय हवाई संपर्क अत्यंत आवश्यक आहे. आंतरराष्ट्रीय विमानसेवेमुळे विदेशी गुंतवणूकदार, उद्योगपती, तज्ज्ञ आणि व्यावसायिकांना छत्रपती संभाजीनगरला येणे सुलभ होईल.

त्यामुळे नवीन गुंतवणूक आकर्षित होऊन स्थानिक उद्योगांच्या विस्ताराला चालना मिळण्यास मदत होईल. आंतरराष्ट्रीय विमानसेवा सुरू झाल्यास पर्यटन, उद्योग, व्यापार, गुंतवणूक, रोजगार आणि एकूणच मराठवाड्याच्या आर्थिक विकासाला नवी झेप मिळण्याची अपेक्षा व्यक्त होत आहे.