Eknath Shinde : भेसळखोरांवर थेट मोक्का! एकनाथ शिंदेंचा तुकाराम मुंढेंना फ्री हँड; लीगल टीमही तयार होणार!

Eknath Shinde News : नागरिकांच्या आरोग्याशी आणि विशेषतः लहान मुलांच्या जीवाशी खेळणाऱ्या दूध, दुग्धजन्य पदार्थ भेसळखोरांवर संघटित गुन्हेगारी अंतर्गत गुन्हा दाखल करण्यात यावेत, अशी सूचना उपमुख्यमंत्री एकनाथ शिंदे यांनी दिली आहे.

मंत्री तसेच उपमुख्यमंत्री कार्यालयाचे अपर मुख्य सचिव असीम गुप्ता, प्रधान सचिव नविन सोना, विधी व न्याय विभागाचे सचिव उदय शुक्ला, अन्न व औषध प्रशासन आयुक्त तुकाराम मुंढे यांच्या उपस्थितीत झालेल्या बैठकीत शिंदेंनी हे आदेश दिले.

भेसळीच्या प्रकरणांमधील कायदेशीर प्रक्रिया अधिक बळकट करण्यासाठी विशेष पावले उचलण्याच्या सूचना देखील त्यांनी दिल्या. ज्यांच्यावर कारवाई होते, त्यांच्या खटल्यांचे कामकाज न्यायालयात सुरू असताना कोणतीही कायदेशीर त्रुटी उरता कामा नये. यासाठी नामवंत व ज्येष्ठ विधीतज्ज्ञांची मदत घेण्यात यावी आणि यासाठी तातडीने एक विशेष लीगल टीम तयार करण्यात यावी, असेही यावेळी त्यांनी सुचित केले.

एफडीएकडून सादरीकरण

विकसित महाराष्ट्र - २०४७' अंतर्गत सन २०२६-२७ या वर्षासाठी विभागासाठी निश्चित करण्यात आलेले टप्पे व त्यांच्या पूर्ततेसाठी करण्यात येत असलेली कार्यवाही संदर्भात आज सह्याद्री अतिथीगृह येथे बैठक घेण्यात आली. यावेळी अन्न व औषध प्रशासन विभागाच्या वतीने सादरीकरण करण्यात आले.