Parbhani: बहुमत असूनही ठाकरेंच्या शिवसेनेचा परभणीत ठरेना महापौर; काँग्रेसमुळं जीव लागला टांगणीला!

Parbhani Mahapalika News: परभणी महापालिकेत सर्वाधिक 25 नगरसेवक निवडून आणत मोठा पक्ष आणि महापौरपदाचा दावेदार असलेल्या शिवसेना उद्धव बाळासाहेब ठाकरे पक्षाचा महापौर कोण? यावर अद्याप एकमत झालेले नाही. दरम्यान, परभणीचा महापौर यावेळी अल्पसंख्याक समाजाचा असेल अशी जोरदार चर्चा सध्या शहरात आहे. पक्षाच्या यशात महत्वाची भूमिका वठवणारे खासदार संजय जाधव यांनी वरिष्ठ नेते ज्याच्या नावावर संमती दर्शवतील तोच महापौर असेल, असे म्हणत सस्पेंस वाढववा आहे. तर काँग्रेस पक्षाची भूमिका या सगळ्या घडामोडीत महत्वाची ठरणार आहे.

परभणी महापालिका निवडणुकीत शिवसेना उद्धव बाळासाहेब ठाकरे पक्ष आणि काँग्रेस आघाडीने मिळून बहुमत गाठले आहे. आता महापौरपदी कोणाला संधी मिळणार? याकडे सगळ्यांचे लक्ष लागले आहे. दरम्यान, काँग्रेसचे नेते विजय वडेट्टीवार यांनी मुंबईत मातोश्रीवर जाऊन उद्धव ठाकरे यांची भेट घेतली होती. चंद्रपूरमध्ये काँग्रेसच्या नगरसेवकांमध्ये फूट पडली आहे. या पार्श्वभूमीवर चंद्रपूरमध्ये उद्धव ठाकरे यांनी मदत केली तरच परभणी मदत करू, अशी स्पष्ट भूमिका वडेट्टीवार यांनी या भेटीत मांडल्याची चर्चा आहे.

परभणीचा महापौर अद्याप ठरत नसल्यामागे हे एक कारण असल्याचे बोलले जाते. परभणी महापालिकेत सर्वात मोठा पक्ष म्हणून समोर आलेल्या शिवसेना उद्धव बाळासाहेब ठाकरे पक्षाकडे गटाकडे संख्याबळ, पाठिंबा आणि सत्तास्थापनेची सुवर्णसंधी असतानाही महापौरपदाचा निर्णय मात्र अजूनही 'लवकरच' या शब्दात अडकून पडला आहे. सत्ता हातात असूनही निर्णय हाताबाहेर जातोय की काय? अशी परिस्थिती निर्माण झाली आहे.

शिवसेना उद्धव बाळासाबेब ठाकरे पक्षाचे 25 नगरसेवक आणि त्यांना पाठिंबा देणारे काँग्रेसचे 11 नगरसेवक सध्या महापौर कोण? या एकाच प्रश्नाभोवती फिरत आहेत. काँग्रेसने आपला निर्णय गुलदस्त्यात ठेवत शिवसेनेच्या चिंतेत आणखी भर घातली आहे. बाहेरून पाठिंबा देणारा पक्षच जर आम्ही पाहतोय या भूमिकेत असेल, तर सत्ताधारी पक्षाची झोप उडणे स्वाभाविकच आहे. शिवसेनेकडून दिलीप ठाकूर यांची गटनेतेपदी आधीच निवड करण्यात आली आहे.

तर काँग्रेसने गुलमीर खान यांच्याकडे गटनेतेपदाची सूत्रे सोपवली आहेत. मात्र गटनेते ठरले, चर्चा झाल्या, बैठका पार पडल्या तरीही महापौर आणि उपमहापौर पदांची नावे मात्र फाईलमध्येच अडकलेली दिसत आहेत. विशेष म्हणजे, महापौरपदासाठी प्रभाग क्रमांक 8 मधील नगरसेवक सय्यद समी उर्फ माजू लाला यांचे नाव यादीत पहिल्या क्रमांकावर असल्याची चर्चा आहे. पण पहिल्या क्रमांकावर नाव असले तरी सर्वांच्या मनात स्थान मिळेलच असे नाही, हेच सध्या शिवसेनेतील अंतर्गत विरोधातून स्पष्ट होत आहे.

पक्षातीलच एका गटाने त्यांच्या नावाला विरोध दर्शवल्याने सर्वात मोठा पक्ष, पण एकमत लहान अशी परिस्थिती निर्माण झाली आहे. राजकीय वर्तुळात सध्या महापौर ठरवायला एवढा वेळ लागतोय, मग शहर चालवायला किती लागणार? असा खोचक सवाल विचारला जात आहे. तर विरोधकांकडून सत्ता मिळाल्यावरही निर्णय न होणे म्हणजे राजकीय कोंडीचे जिवंत उदाहरण असल्याचे बोलले जात आहे. एकीकडे शिवसेना आमचाच महापौर या भूमिकेवर ठाम, तर दुसरीकडे अंतर्गत मतभेद, काँग्रेसचा सावधपणा आणि नावांवरील आक्षेप यामुळे परभणी महापालिकेतील सत्तास्थापना अजूनही 'वेट अँड वॉच' मोडमध्येच आहे.