Municipal Corporation Election: महापालिका स्वबळावर लढण्याची खुमखुमी! पण एमआयएमची भितीही..

छत्रपती संभाजीनगर : नुकत्याच झालेल्या विधानसभा निवडणुकीत महायुतीला दणदणीत यश मिळाले. तर महाविकास आघाडीची धुळधाण उडाली आहे. महायुतीला एकत्रित लढल्यामुळे विधानसभा निवडणुकीत दोनशे पार जागा जिंकता आल्या. पण आगामी महापालिका, जिल्हा परिषद व इतर स्थानिक स्वराज्य संस्था निवडणुकीत महायुती नको, असा सूर स्थानिक नेते, पदाधिकाऱ्यांकडून आळवला जात आहे.

अशीच परिस्थिती महाविकास आघाडीतील शिवसेना उद्धव बाळासाहेब ठाकरे पक्षाची आहे. (Mahayuti) पक्षप्रमुख उद्धव ठाकरे यांच्या कानावर स्वबळावर लढण्याची पदाधिकारी, शिवसैनिकांची इच्छा घातली आहे. त्यांचा आदेश येईल त्या पद्धतीने लढू, असे शिवसेना नेते चंद्रकांत खैरे यांनी म्हटले आहे.

एकनाथ शिंदे यांच्या शिवसेनेचे जिल्हाप्रमुख राजेंद्र जंजाळ यांनी थेट स्वबळाची भाषा केली नसली तरी भाजपने आमचा युतीचा प्रस्ताव नाकारला, तर मात्र आमची तयारी असेल, (Mahavikas Aghadi) असे सांगत स्वबळाचे संकेत दिले.

भाजपचे शहर-जिल्हाध्यक्ष शिरीष बोराळकर यांनी मात्र एकट्यानेच महापालिका निवडणूक लढणार असल्याचे सांगून टाकले. लोकसभा, विधानसभा या निवडणुका नेत्यांच्या असतात, तर महापालिका, जिल्हा परिषद या कार्यकर्ते, पदाधिकाऱ्यांच्या असतात. अशा निवडणुकांमध्येच त्यांना संधी मिळत असते.

गेल्या पाच वर्षात भाजपची शहरात व जिल्ह्यात झालेली संघटनात्मक बांधणी पाहता महापालिकेची निवडणूक स्वबळावरच लढली पाहिजे, असा प्रत्येक भाजप कार्यकर्त्याची भावना आहे, असे बोराळकर यांनी म्हटले आहे. दुसरीकडे महायुती-महाविकास आघाडी स्वबळावर लढली तर याचा थेट फायदा एमआयएमला होऊ शकतो, अशी भिती शिवसेनेचे राजेंद्र जंजाळ यांनी व्यक्त केली आहे.

एमआयएम सारख्या जातीयवादी पक्षाला रोखायचे असल्यानेच आम्ही भाजपला युतीचा प्रस्ताव देऊ. तो त्यांनी स्वीकारला तर ठीक, नाहीतर आम्हीही स्वबळावर लढण्यास तयार असल्याचे जंजाळ यांनी स्पष्ट केले आहे. एकूणच महापालिकेत प्रत्येक पक्षालाच स्वबळाची खुमखुमी असल्याचे चित्र छत्रपती संभाजीनगरमध्ये पहायला मिळते.