Mumbai BMC election: मुंबई महापालिकेत ठाकरे बंधूंना शरद पवारांची साथ! राष्ट्रवादीला मिळणार आता 'इतक्या' जागा?

Mumbai News : मुंबई महापालिकेची निवडणूक जिंकण्यासाठी सर्वच पक्षाने कंबर कसली आहे. ठाकरे बंधूनी आघाडी घेत युती जाहीर केली आहे. त्यातच आता शरद पवार यांच्या पक्षाचे ठरले असून त्यांनी ही मुंबई महापालिकेत ठाकरे बंधूसोबत युती करण्याचा निर्णय घेतला आहे. त्यामुळे आता येत्या काळात महाविकास आघाडीचे बळा वाढणार आहे. शरद पवार यांच्या राष्ट्रवादी काँग्रेसने 25 जागांची मागणी केली होती. मात्र, त्यांच्या पक्षाला आता दहा ते बारा जागा मिळणार आहेत. त्यामुळे त्याकडे सर्वांचे लक्ष लागले आहे.

मुंबई महापालिका निवडणुकीसाठी राष्ट्रवादी काँग्रेस शरद पवार पक्षाने उद्धव ठाकरे यांची शिवसेना (Shivsena) आणि राज ठाकरे यांच्या मनसेसोबत युती केली आहे. यापूर्वी शरद पवार यांच्या पक्षाकडून काँग्रेससोबत जाण्याची देखील चाचपणी सुरू होती. मात्र अखेर आता राष्ट्रवादी शरद पवार गटानं मुंबईत शिवसेना ठाकरे गट आणि मनसे सोबत युती केली आहे. या निवडणुकीमध्ये राष्ट्रवादी शरद पवार गटाला दहा ते बारा जागा मिळण्याची शक्यता आहे.

गेल्या अनेक दिवसांपासून मुंबई महापालिका निवडणुकीसाठी बुधवारी शिवसेना ठाकरे गटाचे प्रमुख उद्धव ठाकरे आणि मनसे प्रमुख राज ठाकरे (Raj Thackeray) यांनी युतीची अधिकृत घोषणा केली. मनसे आणि शिवसेना ठाकरे गटासोबत युती करण्यास शरद पवार यांचा पक्ष उत्सुक होता, याच पार्श्वभूमीवर दोन दिवसांपूर्वी जयंत पाटील यांनी उद्धव ठाकरे यांची भेट घेतली होती.

या दोन्ही नेत्यांमध्ये तब्बल दोन तास चर्चा झाली. राष्ट्रवादी शरद पवार पक्षाकडून शिवसेना ठाकरे गटाला 25 जागांचा प्रस्ताव देण्यात आला होता. ठाकरे बंधूंच्या युतीमध्ये राष्ट्रवादी शरद पवार पक्षाला दहा ते बारा जागा मिळण्याची शक्यता आहे, अशी माहिती सूत्रांकडून मिळत आहे.

दरम्यान मुंबई महापालिका निवडणुकीत आता राष्ट्रवादी शरद पवार गट, शिवसेना ठाकरे गट आणि मनसे एकत्र येणार असल्याने महायुती भाजप आणि शिवसेना शिंदे गटासमोरील आव्हान वाढण्याची शक्यता आहे. तर दुसरीकडे राष्ट्रवादी अजित पवार गट आणि काँग्रेस ही निवडूक स्वबळावर लढवणार असल्याची माहिती सूत्रांकडून मिळत आहे. त्यामुळे या वेळी मुंबई महापालिकेच्या निवडणुकीत मोठी चुरस पहायला मिळू शकते.