Nitesh Rane : तुळजापुरात पाऊल ठेवताच नितेश राणेंचे मोठे विधान; ठाकरे ब्रँड संपण्याचे थेट कारणच सांगितले

Dharashiv News : आगामी काळात होत असलेल्या स्थानिक स्वराज्य संस्थेच्या निवडणुकाच्या पार्श्वभूमीवर उद्धव-राज ठाकरे एकत्र येणार असल्याची चर्चा जोरात सुरु आहे. त्यामुळे राज्यातील वातावरण चांगलेच तापले आहे. ठाकरे बंधू एकत्र येण्याच्या चर्चा सुरु असतानाच तुळजापुरात तुळजाभवानी मातेच्या दर्शनासाठी आलेल्या मंत्री नितेश राणे यांनी पाऊल ठेवताच उद्धव-राज ठाकरे एकत्र येणार असल्याच्या चर्चेवर मोठे विधान करीत राज्याच्या राजकारणातून ठाकरे ब्रँड संपण्याचे कारणच सांगत एकत्र येण्याची खिल्ली उडवली.

राज्याच्या राजकारणात ठाकरे ब्रँड टिकला पाहिजे ही जरी त्यांची भूमिका असली तरी ठाकरे ब्रँड हा हिंदुत्व सोडल्याने संपला आहे. बाळासाहेब ठाकरे आणि हिंदुत्व हे अतूट नाते आहे. ज्यांनी ज्यांनी हिंदुत्व सोडले ते रसातळाला गेले आहेत. त्यामुळे ठाकरे ब्रँड संपण्याचे कारण त्यांनी हिंदुत्व सोडणे हेच असल्याचे राणे (Nitesh Rane) यांनी स्पष्ट केले.

येत्या काळात ठाकरे बंधू एकत्र येत आहेत, त्यावर बोलताना नितेश राणे म्हणाले, 'ठाकरे बंधू एकत्र येणार असल्याने आम्हाला झोप लागत नाही, एकाकडे वीस आमदार आणि एकाकडे शून्य यांची एवढी शक्ती आहे. या शक्तीला आम्ही घाबरलो आहोत. आम्हाला घाम फुटला आहे, अशा शब्दात मंत्री राणे यांनी ठाकरे बंधु युतीची खिल्ली उडवली.

आदित्य ठाकरे झेलवारी करणार

दिनू मोरयावरील होत असलेली कार्यवाही व आदित्य ठाकरे (Aditya Thackeray) यांचे प्रकरण झाकण्यासाठीच ठाकरे बंधू एकत्र येण्याच्या चर्चा सुरु झाल्या आहेत. मात्र, पावसाळ्यातच आदित्य ठाकरे यांना झेलवारी करावी लागणार असल्याची टीका नितेश राणे यांनी प्रसार माध्यमाशी बोलताना केली.

धाराशिव जिल्ह्याच्या दौऱ्यावर असलेल्या नितेश राणे यांनी शनिवारी तुळजाभवानीचे दर्शन घेतले. यावेळी धाराशिव भाजपचे जिल्हाध्यक्ष दत्ता कुलकर्णी, माजी जिल्हाध्यक्ष नितीन काळे यांच्यासह जिल्ह्यातील भाजपचे नेते यावेळी मोठ्या संख्येने उपस्थित होते.