EX MLA Rajesh Tope News : राजेश टोपेंच्या अर्जानंतर घनसावंगी मतदारसंघात होणार ईव्हीएमची फेरतपासणी

उमेश वाघमारे

जालना : नुकत्याच झालेल्या विधानसभा निवडणुकीत काही मतदारसंघात धक्कादायक निकाल लागले. यापैकीच एक असलेल्या घनसांवगी मतदारसंघात राष्ट्रवादी काँग्रेस शरदचंद्र पवार पक्षाचे पराभूत उमेदवार माजी मंत्री राजेश टोपे यांनी फेरमतमोजणीसाठी अर्ज दाखल केला आहे. त्यानूसार पाच ईव्हीएम आणि व्हीव्हीपॅटमधील मतांची फेरतपासणी केली जाणार आहे.

राजेश टोपे (Rajesh Tope) यांचा या मतदारसंघात शिवसेनेचे हिकमत उढाण यांनी 2840 मतांनी पराभव केला. महायुतीला दोनशे पार जागा मिळाल्यापासून ईव्हीएमबद्दल शंका उपस्थित केल्या जात आहेत. राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांनीही या प्रकरणी चौकशीची मागणी केली आहे.

या शिवाय काँग्रेस ईव्हीएमऐवजी बॅलेटवर निवडणुका घ्याव्यात यासाठी देशपातळीवर चळवळ उभारणार असल्याचे सांगितले आहे. (NCP) या पार्श्वभूमीवर मराठवाड्यातील अनेक मतदारंसघांमध्ये पराभूत उमेदवारांनी फेरमतमोजणीची मागणी केली आहे. यात घनसांवगी मतदारसंघातील राजेश टोपे यांचा देखील समावेश आहे.

28 नोव्हेंबर रोजी टोपे यांनी जिल्हा निवडणुक निर्णय अधिकाऱ्यांकडे या संदर्भात लेखी अर्ज दाखल केला होता. त्यानूसार मतदारसंघातील पाच मशीनची तपासणी केली जाणार आहे. नुकत्याच झालेल्या विधासनभा निवडणुकीत घनसावंगी मतदारसंघातून पाच वेळा आमदार राहिलेले राजेश टोपे यांचा निसटता पराभव झाला.

टोपे यांनी ईव्हीएम मशीनवर शंका व्यक्त केली होती. शिवाय जिल्हा निवडणूक अधिकारी यांच्याकडे ईव्हीएम आणि व्हीव्हीपॅट मशीनची तपासणी करण्याची मागणी केली होती. त्यानुसार निवडणूक विभागाच्या वतीने घनसावंगी मतदारसंघात मतदान प्रक्रियेत शिंदे वडगाव, बोररांजनी, सुखापुरी, शेवगा आणि तीर्थपुरी जायकवाडी वसाहत येथील पाच ईव्हीएम आणि व्हीव्हीपॅट मशीनची तपासणी केली जाणार आहे.

अधिकारी, अभियंते आणि उमेदवारांसमोर एका ईव्हीएमवर सुमारे एक हजार 400 पर्यंत मतदान केले जाणार आहे. झालेले मतदान आणि ईव्हीएम, व्हीव्हीपॅट मशीनमध्ये नोंदवलेले मतदान, याची तपासणी केली जाणार असल्याचे जिल्हाधिकारी डॉ. श्रीकृष्ण पांचाळ यांनी सांगितले.