EVM Controversy : ईव्हीएम 'ओक्के', नांदेडमध्ये 75 मतदान केंद्रावरील तपासणीत आकडे जुळले!

नांदेड : विधानसभा निवडणुकीत राज्यात महायुतीला 236 जागा मिळाल्या. लोकसभा निवडणुकीतील अपयशानंतर महायुतीने केलेल्या या कमबॅकमुळे अनेकांच्या भुवया उंचावल्या गेल्या. विशेषतः विरोधी पक्ष आणि महाविकास आघाडीने तर हा महायुतीचा नव्हे तर ईव्हीएमचा विजय असल्याचा आरोप करत 'कुछ तो गडबड है' म्हणत बॅलेटवर निवडणुका घेण्यासाठी चळवळ उभारण्याचा इशारा दिला.

तसेच महाविकास आघाडीच्या राज्यातील अनेक उमेदवारांनी ईव्हीएम आणि व्हीव्हीपॅट च्या मतांची फेरमतमोजणीची मागणी करत निवडणूक आयोगाकडे अर्ज दाखल केले होते. (EVM Machine) लोकसभेच्या नांदेड मतदारसंघातील 30 आणि विधानसभेच्या 45 अशा एकूण 75 मतदान केंद्रांची तपासणी नुकतीच करण्यात आली.

ईव्हीएम आणि व्हीव्हीपॅटच्या मतांची संख्या अचूक आल्याचे स्पष्ट झाले. शनिवारी नांदेडचे जिल्हाधिकारी अभिजीत राऊत यांनीच ही माहिती दिली. (Nanded) विधानसभा मतदारसंघनिहाय पाच व्हीव्हीपॅटमधील चिठ्ठ्या प्रत्यक्ष मोजण्यात आल्या. त्यानंतर त्याची जुळवणी ईव्हीएममधील मतांसोबत करण्यात आली.

यात कुठलाही फरक आढळून आला नाही, असे सांगण्यात आले. नांदेड जिल्ह्यातील नऊ मतदारसंघातील प्रत्येक पाच या प्रमाणे 45 मतदान केंद्रावर ही फेरतपासणी करण्यात आली. तर लोकसभेच्या नांदेड पोटनिवडणुकीसाठी सहा विधानसभा मतदारंसघातील प्रत्येकी पाच अशा तीस मतदान केंद्रावर फेरमतमोजणीची प्रक्रिया राबवण्यात आली होती.

लाॅटरी पद्धतीने मतदान केंद्राची निवड करण्यात आली होती. लोकसभेसाठी भोकर, मुखेड, नांदेड उत्तर,नांदेड दक्षिण,उमरगा या केंद्रावर फेरतपासणी करण्यात आली. तर विधानसभेसाठी किनवट, भोकर, नांदेड उत्तर, नांदेड दक्षिण मतदारंसघातील मतदान केंद्र निवडण्यात आली होती. निवडणुक निरिक्षक आणि वरिष्ठ सनदी अधिकाऱ्यांच्या उपस्थितीत शनिवारी ही प्रक्रिया पार पडली.