Shirsat V/S Sattar News : सत्तार यांनी माझ्यासह बोरणारे, संजना जाधव यांच्याविरोधात काम केले!

छत्रपती संभाजीनगर : शिवसेनेचे माजीमंत्री अब्दुल सत्तार (Abdul Sattar) यांच्यावर लोकसभा निवडणुकीत जालना मतदारसंघात महायुती असताना भाजपचे उमेदवार तत्कालीन माजी केंद्रीय रेल्वे राज्यमंत्री रावसाहेब दानवे यांच्या विरोधात काम केल्याचा आरोप आहे. यातच आता राज्याचे सामाजिक न्याय मंत्री संजय शिरसाट यांनी अब्दुल सत्तार यांच्यावर गंभीर आरोप करत विधानसभा निवडणुकीत त्यांनी माझ्यासह वैजापूरचे आमदार प्रा. रमेश बोरणारे, कन्नड च्या संजना जाधव यांच्या विरोधात काम केल्याचे म्हटले आहे.

एक जानेवारी रोजी माजीमंत्री अब्दुल सत्तार यांनी छत्रपती संभाजीनगरात आपला वाढदिवस साजरा करत मोठे शक्तिप्रदर्शन केले. यावेळी केलेल्या भाषणात त्यांनी (Sanjay Shirsat) संजय शिरसाट यांच्यावर निशाणा साधला होता. 'सिल्लोड मध्ये तुम्ही काय येता, मीच संभाजीनगरला तुमची गुंडगिरी संपवायला येणार आहे' असा इशारा सत्तार यांनी दिला होता. त्यानंतर संजय शिरसाट यांनी आज अब्दुल सत्तार यांच्यावर पलटवार केला.

छत्रपती संभाजीनगर जिल्ह्यात शिवसेनेचे नेतृत्व कोण करणार? यावरून सध्या मंत्री संजय शिरसाट आणि माजीमंत्री अब्दुल सत्तार यांच्यात रस्सीखेच सुरू आहे. पालकमंत्री हेच जिल्ह्याचे नेतृत्व करतात असे सांगत शिरसाट यांनी आपणच जिल्ह्याचे नेते असल्याचे सत्तार यांना ठणकावून सांगितले. तर दुसरीकडे शिवसेनेचे आमदार प्रदीप जयस्वाल यांनी या वादात उडी घेत जिल्ह्याचे नेतृत्व एकनाथ शिंदे हेच करतील, असे सांगत सावध भूमिका घेतली आहे.

देवेंद्र फडणवीस यांच्या मंत्रिमंडळात स्थान न मिळाल्यामुळे नाराज असलेल्या अब्दुल सत्तार यांनी संभाजीनगर मध्ये अभिष्टचिंतन सोहळा घेत सर्व पक्षात आपली ताकद असल्याचे दाखवण्याचा प्रयत्न केला. उपमुख्यमंत्री एकनाथ शिंदे, मुख्यमंत्री देवेंद्र फडणवीस यांचा जोपर्यंत आपल्यावर विश्वास आहे, तोपर्यंत आपण त्यांच्यासोबत असल्याचे सांगत आपण जिल्ह्यात इतर कोणाला जुमानत नाही हे सत्तार यांनी सुचित केले.

शिवसेनेत फूट पडल्यानंतर एकनाथ शिंदे यांच्या नेतृत्वाखाली अब्दुल सत्तार आणि संजय शिरसाट काम करत असले तरी या दोघांमध्ये प्रचंड मतभेद असल्याचे वारंवार दिसून आले आहे. एकनाथ शिंदे यांच्या मंत्रिमंडळात संजय शिरसाट यांना संधी न मिळण्यामागे अब्दुल सत्तार हेच होते, असा आरोप सातत्याने शिरसाट आणि त्यांच्या समर्थकांकडून केला जातो. या वादाची धग संजय शिरसाट मंत्री झाल्यानंतर कायम असून त्यात आणखी वाढ झाल्याचे दिसत आहे.

सत्तार यांनी शिरसाट यांना डिवचल्यानंतर आता विधानसभा निवडणुकीत सत्तार यांनी कसे पक्षाच्या विरोधातच काम केले याचा भांडाफोड केला आहे. औरंगाबाद पश्चिम विधानसभा मतदारसंघात संजय शिरसाट यांची अडचण करण्यासाठीच अब्दुल सत्तार यांनी एमआयएमचे प्रदेशाध्यक्ष इम्तियाज जलील यांना हाताशी धरत शिवसेना उद्धव बाळासाहेब ठाकरे पक्षाचे उमेदवार राजू शिंदे यांना मदत होईल, अशी भूमिका घेतली होती.

एमआयएम कडून अरुण बोर्डे हे पश्चिम मधून निवडणूक लढण्यास इच्छुक असताना सत्तार यांनीच इम्तियाज जलील यांना सांगून पश्चिम मध्ये उमेदवारच दिला नव्हता, अशी चर्चा त्यावेळी होती. शिरसाट यांच्या आरोपाने त्याला आता पुष्टी मिळाली आहे. एकूणच संभाजीनगर जिल्ह्यात मंत्री संजय शिरसाट विरुद्ध माजीमंत्री अब्दुल सत्तार यांच्यातील संघर्ष दिवसेंदिवस वाढत जाणार, असे दिसते.