Shivsena UBT News : नांदेडला उद्धव ठाकरेंनी दिले तीन जिल्हाप्रमुख! आष्टीकर पिता-पुत्रावरही मोठी जबाबदारी

लक्ष्मीकांत मुळे

नांदेड : आगामी महापालिका, जिल्हा परिषद निवडणुका लक्षात घेता (Nanded) नांदेड जिल्ह्यात शिवसेना उद्धव बाळासाहेब ठाकरे पक्षाने संघटनात्मक नियुक्त्या जाहीर केल्या आहेत. नांदेड जिल्ह्यासाठी शिवसेना पक्षप्रमुख उद्धव ठाकरे यांच्या आदेशानूसार तीन जिल्हाप्रमुख नेमण्यात आले आहेत. तर सहसंपर्कप्रमुख पदाची जबाबदारी हिंगोलीचे खासदार नागेश पाटील आष्टीकर यांच्यावर सोपवण्यात आली आहे.

नांदेड जिल्ह्यातील (Shivsena) शिवसेना जिल्हाप्रमुख, युवासेना मराठवाडा सचिव व नांदेड- हिंगोली सहसंपर्कप्रमुखांची घोषणा करण्यात आली आहे. यात सहसंपर्कप्रमुख म्हणून खासदार नागेश पाटील आष्टीकर यांची नियुक्ती करण्यात आली आहे. तर जिल्हाप्रमुख म्हणून बबनराव बारसे, भुजंगराव डक आणि ज्योतीबा खराटे यांच्यावर जबाबदारी टाकण्यात आली आहे. विधानसभा निवडणुकीत जिल्ह्यात महाविकास आघाडीचा एकही उमेदवार निवडून आला नाही.

त्यामुळे येणाऱ्या काळात होणाऱ्या स्थानिक स्वराज्य संस्था निवडणुकांमध्ये यश मिळण्यासाठी महाविकास आघाडीचा घटक पक्ष असलेल्या शिवसेनेने संघटनात्मक पातळीवर काम सुरू केले आहे. पक्षप्रमुख उध्दव ठाकरे यांनी नांदेड जिल्ह्यातील नियुक्त्या जाहीर केल्या आहेत. विद्यमान जिल्हाप्रमुख बबनराव बारसे यांच्यावर नांदेड उत्तर,भोकर व मुखेड या तीन विधानसभा मतदारसंघाची जबाबदारी देण्यात आली आहे.

कृषी उत्पन्न बाजार समितीचे उपसभापती भुजंगराव डक यांच्यावर नांदेड दक्षिण,लोहा- कंधार,देगलूर तर ज्योतीबा खराटे यांच्यावर किनवट, हादगाव, नायगाव या तीन विधानसभा मतदारसंघाची जबाबदारी सोपवण्यात आली आहे. युवा सेनेच्या मराठवाडा सचिवपदी कृष्णा पाटील आष्टीकर यांची नियुक्ती करण्यात आली आहे.

जिल्ह्यातील नवनियुक्त जिल्हाप्रमुखांना पक्षप्रमुख उद्धव ठाकरे यांनी शुभेच्छा दिल्या असून येणाऱ्या काळातील सर्व निवडणुकीत शिवसेनेचा भगवा फडकवण्याचे आदेश दिले आहेत. या नवनियुक्त जिल्हाप्रमुखांचे नांदेडच्या हुजुर साहेब रेल्वे स्थानकावर रविवारी (ता पाच) सकाळी आगमन होणार आहे.