MSC Bank Case : बँक घोटाळ्याप्रकरणी अजितदादांना दिलासा मिळणार का? हजारेंसह तक्रारदारांना नोटिसा

महाराष्ट्र राज्य सहकारी बँक घोटाळा प्रकरण बंद करण्याच्या अहवालानंतर विशेष न्यायालयाने तक्रारदारांना नोटिसा बजावून म्हणणे मांडण्याच्या सूचना केल्या आहेत. ज्येष्ठ समाजसेवक अण्णा हजारे ( Anna Hazare ), शालिनीताई पाटील, माणिकराव जाधव आणि किसान कावड यांनी या घोटाळ्याबाबत तक्रार केली होती. ( Court notice Anna Hazare Msc Bank Scam case )

मुंबई पोलिसांच्या आर्थिक गुन्हे शाखेनं महाराष्ट्र राज्य सहकारी बँक घोटाळा प्रकरणाचा तपास बंद करण्याचा अहवाल दुसऱ्यांदा सादर केला आहे. या अहवालावर मूळ तक्रारदारांनी म्हणणे मांडण्यासाठी विशेष न्यायालयाने नोटिसा काढल्या आहेत. यावर तक्रारदार काय भूमिका मांडतात, याकडे लक्ष लागले आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

महाविकास आघाडी सरकार असताना उपमुख्यमंत्री अजित पवार ( Ajit Pawar ) आणि इतर संशयितांविरोधात सबळ पुरावे नसल्याने प्रकरण बंद करण्याचा अहवाल आर्थिक गुन्हे शाखा पोलिसांनी न्यायालयासमोर सादर केला होता. यावर तक्रारदारांनी आक्रमक भूमिका घेत विशेष न्यायालयात निषेध याचिका दाखल केली होती. दाखल पुराव्याच्या आधारे तपास करण्याची आणि प्रकरणातील संशयितांना समन्स बजावण्याची मागणी केली होती. यावर तपास यंत्रणेनं न्यायालयासमोर पुढील तपास करण्यासाठी परवानगीची मागणी केल्यावर ती मान्यदेखील करण्यात आली.

विशेष न्यायालयाने तपास यंत्रणेला यावर दाखल तक्रारीवर तपास कुठपर्यंत आलाय आणि तो कधीपर्यंत पूर्ण होईल याची विचारणा केली. याबाबत भूमिका स्पष्ट करण्याचा आदेश दिला. यावर आर्थिक गुन्हे शाखेनं उपमुख्यमंत्री अजित पवार यांच्यासह संशियातांविरोधात पुरावेच नाहीत, असे सांगितले. याशिवाय प्रकरण बंद करण्याचा अहवाल सादर केला. हा अहवाल आर्थिक गुन्हे शाखेनं दुसऱ्यांदा सादर केला आहे. यावर विशेष न्यायालयाने मूळ तक्रारदारांना नोटिसा काढून म्हणणे सादर करण्याच्या सूचना केल्या आहेत.

( Edited By : Akshay Sabale )

R