Mumbai Mayor Election : महापौर पदासाठी शिंदेंचे दबावाचे राजकारण, उद्धव ठाकरे थेट भाजपला मदत करणार?

Uddhav Thackeray News : एकनाथ शिंदे हे मुंबईत अडीच वर्षासाठी महापौरपद मिळावेत म्हणून आग्रही आहेत. त्यांनी आपल्या नगरसेवकांना हाॅटेलवर मुक्कामी ठेवले आहेत. प्रशिक्षणासाठी नगरसेवकांना तेथे आणले आहे, असे सांगितले जात आहे. मात्र, यातून शिंदे दबावाचे राजकारण करू पाहत असल्याची चर्चा आहे.

दरम्यान,शिंदेंच्या मदतीशिवाय भाजपचा महापौर होऊ शकणार नाही. त्यामुळे शिंदेंच्या काही मागण्या भाजप मान्य करण्याची शक्यता वर्तवली जात असताना ठाकरे मोठा निर्णय घेण्याच्या तयारी आहेत.

ज्या प्रमाणे 2017 ला भाजपने महापौर निवडणूकीत सभात्याग करून अप्रत्यक्ष शिवसेनेला मदत केली होती. त्याच प्रमाणे ठाकरेंचे नगरसेवक देखील महापौर निवडणुकीच्या वेळी सभागृह त्याग करण्याची शक्यता आहे. ज्यामुळे सभागृहाची सदस्यसंख्या कमी होऊन त्याचा थेट फायदा भाजपला होणार आहे. या विषयीचे वृत्त एका मराठी वृत्तवाहिनीने दिले आहे.

एकनाथ शिंदेंना दिल्लीतून चावी

भाजपसाठी एकनाथ शिंदे हे लोहपुरुष आहे. कारण त्यांनी शिवसेना फोडली ना.अमित शाह हे शिंदेंना दिल्लीत खांद्यावर घेऊन फिरतात. तेच शिंदे 29 नगरसेवकांवर महापौरपदावर दावा सांगत आहेत. कारण फडणवीसांना रोखण्यासाठी त्यांना दिल्लीतून चावी दिली जात असल्याचा दावा, संजय राऊत यांनी केला.