Shivsena UBT: 'शिवसेनेतून शिवसेनेतच गेलोय' ठाकरेंची साथ सोडल्यानंतर नागेश पाटील आष्टीकरांचे मोठे विधान

Shivsena UBT: शिवसेना ( उद्धव बाळासाहेब ठाकरे) पक्षातील ६ खासदारांनी स्वतंत्र गट स्थापन केला असून ओम राजेनिंबाळकर यांच्यासह हिंगोलीचे खासदार नागेश पाटील आष्टीकर यांनीही ठाकरेंची साथ सोडत शिवसेनेत प्रवेश केल्याचं निश्चित झालं आहे. यासंदर्भात स्वत: नागेश पाटील आष्टीकर यांनी फेसबुक लाईव्हच्या माध्यमातून आपली भूमिका मांडली आहे. 'मी दुसरीकडे कुठेही गेलो नाही, शिवसेनेतून शिवसेनेतच गेलोय', असे आष्टीकर यांनी स्पष्ट केलं आहे. सत्तेत असल्याशिवाय कामं होत नव्हती, म्हणूनच मी हा निर्णय घेतल्याचं आष्टीकर यांनी म्हटलं आहे.

"आम्ही १८ जूनपर्यंत कुठेही गेलो नव्हतो, मात्र शिवसेना वर्धापन दिनाच्या मेळाव्यात आमच्यावर बोचरी टीका करण्यात आली, त्याने आमची मनं दुखावली. पण, खरं सांगायचं तर आपण पाहतोय गेल्या अनेक दिवसांपासून सत्तेशिवाय कुठलेही कामे होत नाहीत. मी जे काही पाऊल उचललं, ते लोकांनी मला ज्या आशेनं खासदार म्हणून निवडून दिलंय, ती त्यांची कामे पूर्ण करायची म्हणून. सत्तेत असल्याशिवाय लोकांची ही कामे होत नव्हती. अनेकांना माझी भूमिका पटली नसेल, काहींना पटलीही असेल. मी तुम्हाला म्हटल्याप्रमाणे, मला तुमच्याकडे सालानं ठेवा, मी तुमचं साल नेकीनं करेन. माझ्यावर तुम्ही जी जबाबदारी ठेवलीय, ती जबाबदारी निश्चितपणे पार पाडेन", असे नागेश पाटील आष्टीकर यांनी म्हटले.

'शिवसेनेतून शिवसेनेतच गेलोय'

"मी माझ्या कामातून नाराज कार्यकर्त्यांना दाखवून देईल, मी दुसरं कुठंही गेलो नाही, शिवसेनेतुन शिवसेनेतच गेलोय, मी विचारधारा सोडलेली नाही, कृपया कुणीही असंविधानिक बोलू नका, राग व्यक्त करा पण असंविधानिकपणे नको, शब्द मनाला खूप लागतात. कारण, आपल्याच गावच्या बाभळी आणि आपल्याच गावच्या बोरी.." असे म्हणत त्यांनी नाराज कार्यकर्त्यांची मनधरणी केली.

संजय राऊतांना गर्भित इशारा

"संजय राऊत म्हणाले की, झोडून काढा, हरकत नाही ते माझ्या वडिलांसारखे आहेत, त्यांनी बोलायला हरकत नाही. मात्र, झोडून काढू म्हटले तरी कोणीही कोणाला कमी नसतं, त्याचे परिणाम वाईट होतात", असे म्हणत त्यांनी संजय राऊतांना गर्भित इशारा दिला.