Eknath Shinde Solapur Tour : शहाजीबापूंच्या त्राग्यानंतर एकनाथ शिंदे स्वतः मैदानात; भाजप-शेकाप युतीला सांगोल्यात जाऊन देणार उत्तर

सोलापूर जिल्ह्यात भाजपने सर्व नगरपालिका स्वतःच्या बळावर लढवण्याचा निर्णय घेतला, पण सांगोल्यात शेकापसोबत युती करून शिवसेनेला डावलले.
माजी आमदार शहाजीबापू पाटील भाजपच्या या निर्णयावर तीव्र नाराज असून शिवसेनेला पाठबळ देत आहेत.
उपमुख्यमंत्री एकनाथ शिंदे सांगोला, अक्कलकोट, दुधनी आणि मोहोळ सभांमधून भाजपला थेट उत्तर देण्याची शक्यता.

Solapur, 22 November : सोलापूर जिल्ह्यातील सर्व अकरा नगरपालिका आणि अनगरची नगरपंचायत भारतीय जनता पक्षाने स्वबळावर लढविण्याचा निर्णय घेतला. पालकमंत्री जयकुमार गोरे यांच्या पुढाकाराने सर्व ठिकाणी उमेदवारही देण्यात आले. मात्र, सांगोल्यात शेतकरी कामगार पक्षासोबत युती करताना भाजपने आपला मित्रपक्ष शिवसेनेला डावलले आहे, त्यामुळे माजी आमदार शहाजीबापू पाटील हे प्रचंड संतापले आहेत, त्याच शहाजीबापूंना पाठबळ देत भाजप-शेकाप युतीला उत्तर देण्यासाठी उपमुख्यमंत्री एकनाथ शिंदे हे उद्या (ता. २३ नोव्हेंबर) सांगोल्यात येणार आहेत.

उपमुख्यमंत्री एकनाथ शिंदे (Eknath Shinde) हे उद्या (ता. २३ नोव्हेंबर) सोलापूर दौऱ्यावर येत आहेत. ते सकाळी माजी मंत्री सिद्धराम म्हेत्रे यांच्या अक्कलकोटमधून दौऱ्याला सुरुवात करणार आहेत. दुधनी आणि अक्कलकोट नगरपालिकेसाठी ते अक्कलकोट शहरात सभा घेत आहेत. त्यानंतर ते मोहोळ आणि सांगेाल्यात सभा घेणार आहेत.

सांगोला, अक्कलकोट, दुधनी आणि मोहोळमध्ये शिवसेनेचा (Shivsena) थेट भाजपशी सामना होत आहे. याठिकाणी शिंदे आपल्या मित्राबाबत काय बोलतात, याकडे राजकीय वर्तुळाचे लक्ष असणार आहे. आजचा त्यांचा पालघरमधील मूड पाहता ते भाजपशी दोन हात करण्याची शक्यता वर्तविण्यात येत आहे.

सांगोल्या भाजपकडून मिळालेल्या वागणुकीबद्दल माजी आमदार शहाजीबापू पाटील कमालीचे दुखावले आहेत. त्यांनी माध्यमांसमोर संताप, तक्रार मांडण्यास सुरुवात केली आहे. त्या पार्श्वभूमीवर उपमुख्यमंत्री शिंदे यांचा सांगोला दौरा होत आहे.

गेल्या काही दिवसांपासून राज्यात भाजप व शिवसेना यांच्यात स्पर्धा वाढलेली दिसत आहे. त्याचा परिणाम भाजप व शिवसेनेत दुरावा निर्माण झाल्याचे चित्र वरवर तरी दिसत आहे. त्यामुळे शिंदे यांच्या सोलापूर दौऱ्याकडे लक्ष लागले आहे.

सोलापूर जिल्ह्यात १२ ठिकाणी भाजपने नगराध्यक्षपदाचे उमेदवार दिले आहेत. भाजपच्या विरोधात जिल्ह्यात उपमुख्यमंत्री शिंदे यांची शिवसेना ताकदीने लढताना दिसत आहे. माजी मंत्री सिद्धराम म्हेत्रे, माजी आमदार शहाजी पाटील, माजी आमदार जयवंतराव जगताप, माजी नगराध्यक्ष रमेश बारसकर हे शिवसेनेचा किल्ला ताकदीने लढवताना दिसत आहेत. करमाळा, मोहोळ, सांगोला, दुधनी, अक्कलकोट या नगरपालिकांमध्ये शिवसेना डार्क हॉर्स ठरण्याची शक्यता आहे. त्यामुळे उपमुख्यमंत्री शिंदे यांच्या सोलापूर दौऱ्याला विशेष महत्त्व आहे.

Q1: सोलापूरमधील सर्व नगरपालिका कोण लढवत आहे?
भाजपने सर्व नगरपालिका स्वबळावर लढवण्याचा निर्णय घेतला आहे.

Q2: सांगोल्यात काय विवाद निर्माण झाला आहे?
भाजपने शेकापसोबत युती करताना शिवसेनेला डावलल्याने विवाद निर्माण झाला.

Q3: शहाजीबापू पाटील का नाराज आहेत?
सांगोल्यात शिवसेनेला कमी लेखल्यामुळे ते दुखावले आहेत.

Q4: उपमुख्यमंत्री शिंदे यांच्या दौऱ्याचे महत्त्व काय?
भाजपविरोधातील शिवसेनेची रणनीती स्पष्ट करण्यासाठी हा दौरा महत्त्वाचा मानला जात आहे.