Eknath Shinde: कात्रजच्या चौकातूनच एकनाथ शिंदे थोपटणार दंड! ठाकरेंच्या शिवसेनेसह, वसंत मोरेंना देणार आव्हान

Pune News : पुणे महानगरपालिकेची निवडणूक ही शिवसेनेच्या दोन्ही गटांसाठी प्रतिष्ठेची निवडणूक असणार आहे. शिवसेनेचे दोन भाग झाल्यानंतर प्रथमच महापालिका निवडणुका होत असून आपल्या पक्षाची ताकद आणि अस्तित्व दाखवून देण्यासाठी दोन्हीही शिवसेना एकमेकांसमोर तगडा आव्हान उभा करण्याच्या तयारीत आहेत.

पुणे महानगरपालिका निवडणुकीमध्ये भाजप आपल्या मित्र पक्षांसोबत महायुती करण्याच्या मनस्थिती दिसत नाही. त्यामुळे कुठेतरी उपमुख्यमंत्री एकनाथ शिंदे यांच्या शिवसेनेला स्वबळावर निवडणूक लढावी लागू शकते. तर दुसरीकडे शिवसेना उद्धव बाळासाहेब ठाकरे पक्ष हा मात्र मनसे अथवा महाविकास आघाडीतील इतर पक्षांसोबत आघाडी करून मैदानात उतरणार आहे.

एकीकडे शिंदेंच्या शिवसेनेची पुण्यातील, महापालिका निवडणुकीबाबतची महत्त्वाची जबाबदारी काँग्रेसमधून शिवसेनेत प्रवेश केलेल्या माजी आमदार रवींद्र धंगेकर यांच्यावर आहे. तर दुसरीकडे ठाकरेंच्या शिवसेनेची मदार ही मनसेतून ठाकरेंच्या शिवसेनेत दाखल झालेल्या वसंत मोरे यांच्यावर असणार आहे.

यंदा वसंत मोरे हे महापालिकेच्या निवडणूक रिंगणामध्ये आपल्या मुलासोबत उतरणार आहेत. त्यामुळे स्वतःबरोबर मुलाला निवडून आणण्याची जबाबदारी वसंत मोरे यांच्या असणार आहे. त्यासोबतच पुणे शहरातील यांच्या सेनेचा भार देखील वसंत मोरे यांना उचलावा लागणार आहे. त्यामुळे दोन आघाड्यांवर वसंत मोरे यांची कसरत लागणार आहे.

अशातच एकनाथ शिंदे यांच्या शिवसेनेकडून पुणे महानगरपालिकेचा प्रचाराचा नारळ हा वसंत मोरे यांच्या प्रभागातील कात्रज मधून फुटणार आहे, याची घोषणा मंत्री उदय सामंत यांनी केली आहे. पुण्यामध्ये माध्यमांशी बोलताना उदय सामंत म्हणाले, "कात्रज परिसरामध्ये 35 कोटी रुपयांचा निधी एकनाथ शिंदे यांच्यामार्फत देण्यात आला आहे. त्याचा जीआर हँड ओव्हर करण्यासाठीच मी इथे आलो होतो. काही दिवसांमध्ये एकनाथ शिंदे हे नवले ब्रिज परिसरात स्वतः पाहणी करणारा आहेत. तसेच कात्रज परिसरातील 35 कोटींच्या कामांचे भूमिपूजन यांच्या हस्ते होणार आहे. या माध्यमातूनच आमच्या महापालिकेच्या प्रचाराला सुरुवात होणार आहे"