Ajit Pawar News : "...तोपर्यंत मी गप्प बसणार नाही," अजितदादांचं शरद पवार, मुख्यमंत्री अन् फडणवीसांसमोर विधान

मुख्यमंत्री एकनाथ शिंदे ( Eknath Shinde ) आणि उपमुख्यमंत्री देवेंद्र फडणवीस ( Devendra Fadnavis ) यांना ग्वाही देतो, एक दिवस असा येईल की बारामती महाराष्ट्रातील नंबर एकचा तालुका असेल. तोपर्यंत मी गप्प बसणार नाही, असं विधान उपमुख्यमंत्री अजित पवार यांनी केलं आहे. काम केलं, तर एक नंबरचं करतो. नाहीतर भानगडीत पडत नाही, असंही अजित पवारांनी ( Ajit Pawar ) रोखठोक सांगितलं.

बारामतीत आज ( 2 मार्च )'नमो महारोजगार' मेळावा पार पडत आहे. तसेच, बारामती बस स्थानक, बऱ्हाणपूर येथील पोलिस उपमुख्यालय आणि बारामती शहरातील अपर पोलिस अधीक्षक कार्यालय, शहर पोलिस स्टेशनच्या इमारतीचं उद्घाटन मुख्यमंत्री एकनाथ शिंदे, माजी कृषिमंत्री शरद पवार, उपमुख्यमंत्री देवेंद्र फडणवीस, उपमुख्यमंत्री अजित पवार, खासदार सुप्रिया सुळे यांच्या उपस्थितीत करण्यात आले. पण, सर्वांच्या नजरा शरद पवार आणि अजित पवार यांच्याकडे लागून होत्या.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

अजित पवार भाषणाला उभे राहिले, तेव्हा 'एकच वादा, अजितदादा' अशा घोषणा कार्यकर्त्यांकडून देण्यात आल्या. अजित पवार म्हणाले, "राज्यात, देशात, विदेशात मोठ्या प्रमाणात रोजगार आहेत. फक्त संधीचं सोनं केलं पाहिजे."

"बारामती पोलिस हाउसिंगची दुरवस्था झाली होती. पोलिस कसं राहायचे, याचा मला कमीपणा वाटत होता. पूर्वी 73 पोलिस क्वाॅर्टर्स होत्या. पण, 7 मजली इमारती बांधून 196 क्वाॅर्टर्स केले आहेत. यासाठी 75 कोटींचा निधी खर्च करण्यात आला. बारामती बस स्थानकाची जागा कमी होती. मात्र, महाराष्ट्रात एक नंबरचं बस स्थानक आपण निर्माण केलं आहे. करायचं तर नंबर एकच करायचं.. नाहीतर भानगडीत पडायचं नाही," असं अजित पवारांनी सांगितलं.

"माझी फुशारकी नाही, पण प्रत्येक इमारतीचा पाया घेतल्यापासून पूर्णत्वाला जाईपर्यंत एका इमारतीला 40 वेळा भेट दिली, हे मुख्यमंत्र्यांना मला सांगायचं आहे. पोलिसांना गस्त घालण्यासाठी, कायदा सुव्यवस्था चांगली राहण्यासाठी गुंड प्रवृत्तीच्या लोकांवर अंकुश ठेवण्यासाठी साधने लागतात. त्यासाठी पोलिसांना 39 वाहनं उपलब्ध करून देण्यात आली आहे. कुणाचीही गुंडगिरी महाराष्ट्रात खपवून घेतली जाणार नाही," असं अजित पवारांनी म्हटलं.

"पोलिसांना उपलब्ध करून देण्यात आलेल्या वाहनांच्या 14 चालक या महिला आहेत. महिलांना संधी देण्याचं काम महायुतीचं सरकार करत आहे," असंही अजित पवार म्हणाले.