Pandharpur MNS : राज ठाकरेंचा पंढरपुरातील शिलेदार अडचणीत; मनसेच्या नेत्यावर ‘हा’ गुन्हा दाखल

Solapur, 12 August : महाराष्ट्र नवनिर्माण सेनेचे पंढरपूर तालुकाध्यक्ष शशिकांत त्र्यंबक पाटील यांच्यावर वाळूचोरी प्रकरणी गुन्हा दाखल करण्यात आला आहे. परवानगी नसतानाही वाळूउपसा केल्याने पोलिसांनी पाटील यांच्यावर ही कारवाई केली आहे. तालुकाध्यक्ष असणाऱ्या व्यक्तीवर गुन्हा दाखल झाल्याने राजकीय वर्तुळात खळबळ उडाली आहे.

वाळू उपशा करण्यासाठी महसूल विभागाची कोणतीही परवानगी न घेता मनसेचे (MNS) पंढरपूर तालुकाध्यक्ष शशिकांत पाटील यांनी अजनसोंड (ता. पंढरपूर) येथे भीमा नदी पात्रातून वाळूउपसा केला. पाटील यांनी त्या वाळूची साठवणूक केली होती. त्यावरून शशिकांत पाटील यांच्यावर सोमवारी (ता. 11 ऑगस्ट) गुन्हा दाखल झाला आहे.

पंढरपूर (Pandrapur) तालुक्यातील अजनसोंड येथील भीमा नदीपात्रातून वाळूचोरी होत असल्याची माहिती मंडलाधिकारी रिगन नंदू चव्हाण यांना मिळाली होती. प्रांताधिकारी सचिन इथापे, तहसीलदार सचिन लंगुटे यांच्या सूचनेनुसार मंडलाधिकारी चव्हाण यांनी कारवाईची रुपरेषा ठरवली. चव्हाण यांनी अजनसोंडचे ग्राम महसूल अधिकारी दादासाहेब सरक, महसूल सेवक दिगंबर बंगाळे, तसेच पोलिस पाटील मेघा घाडगे यांना फोन करून त्याबाबतची माहिती दिली.

मंडलाधिकारी चव्हाण यांच्या फोननंतर सरक, बंगाळे आणि घाडगे यांनी एकत्र येत अजनसोंड ग्रामपंचायत कार्यालयाच्या पाठीमागील बाजूस असलेल्या रस्त्याने भीमा नदीपात्रालगत गेले. त्या वेळी या चौघांना त्या ठिकाणी अवैध वाळूचा एक ब्रॉसचा साठा असल्याचे आढळून आले. त्या अवैध वाळूसाठ्याचा पोलिस पाटील मेघना घाडगे आणि महसूल सेवक दिगंबर बंगाळे यांच्या समक्ष पंचानामा करण्यात आला.

संंबंधित वाळू साठ्याबाबत स्थानिक लोकांकडे चौकशी केली असता तो महाराष्ट्र नवनिर्माण सेनेचे पंढरपूर तालुकाध्यक्ष शशिकांत पाटील यांनी केल्याची माहिती मिळाली. त्या अवैध वाळूसाठ्यांची अंदाजे किंमत सहा हजार रुपयांपर्यंत आहे.

मंडलाधिकारी रिगन चव्हाण यांनी या अवैध वाळूसाठ्याबाबत पोलिसांत फिर्याद दिली. चव्हाण यांच्या फिर्यादीवरून मनसेचे शशिकांत पाटील यांच्यावर वाळूचोरी आणि त्याचा साठा केल्या प्रकरणी गुन्हा दाखल करण्यात आला आहे. पोलिस निरीक्षक टी. वाय. मुजावर यांनी याबाबतची माहिती दिली.