NCP SP : जयंत पाटलांनी पहिल्या उमेदवाराची घोषणा केली : महाविकास आघाडी बाजूला ठेवून घरच्याच मैदानातून केली सुरुवात

Sangali News : आगामी स्थानिक स्वराज्य संस्थेच्या निवडणुका महाविकास आघाडी एकत्र लढणार असे सांगितले जात असताना राष्ट्रवादी काँग्रेस शरदचंद्र पवार पक्षाचे नेते आणि माजी मंत्री व आमदार जयंत पाटील यांनी महाविकास आघाडीलाच विचारात न घेता नगराध्यक्षपदाचा उमेदवार जाहीर केला आहे. पाटील यांनी या ठिकाणचा उमेदवार जाहीर करीत आघाडी घेतली आहे.

पाटील यांनी त्यांच्या घरच्या मैदानावर म्हणजेच ईश्वरपूर (इस्लामपूर) नगरपालिकेचा उमेदवार जाहीर केला आहे. माजी नगराध्यक्ष आनंदराव मलगुंडे राष्ट्रवादी शरदचंद्र पवार पक्षाचे उमेदवार असतील, अशी घोषणा आमदार जयंत पाटील (Jayant Patil) यांनी कार्यकर्त्यांच्या बैठकीत केली. त्यामुळे आता आगामी काळात होत असलेल्या या निवडणुकीकडे सर्वांचे लक्ष लागले आहे.

आगामी नगरपालिकांच्या निवडणुकीच्या पार्श्वभूमीवर आमदार पाटील यांनी शहरातील राष्ट्रवादी काँग्रेस कार्यालयात कार्यकर्त्यांची बैठक घेतली. या बैठकीला शहरातील बूथ प्रमुख आणि पहिल्या फळीतील कार्यकर्ते उपस्थित होते. या बैठकीत आमदार पाटील यांनी वरिष्ठ पातळीवरून मलगुंडे यांच्या नावाला उमेदवार म्हणून पसंती मिळाल्याचे जाहीर करत पत्र वाचून दाखवले. यावेळी भाजपवर निशाणा सातत्याने या निवडणुकीत भाजपने महायुती न करता स्वतंत्रपणे निवडणूक लढवून दाखवावी, असे खुले आव्हान त्यांनी दिले आहे.

आमदार पाटील म्हणाले, ‘‘मलगुंडे माजी नगराध्यक्ष आहेत. मितभाषी, अजातशत्रू अभ्यासू व्यक्तिमत्त्व आहे. सर्वांचा त्यांना एकमुखी पाठिंबा आहे. नगरसेवक पदासाठी इच्छुकांच्या मुलाखती घेऊ. शिवाय, महाविकास आघाडीचे सर्व घटकपक्ष शिवसेना (Shivsena) व काँग्रेसच्या स्थानिक नेत्यांशी चर्चा करू', असेही आमदार पाटील यांनी स्पष्ट केले.

महायुतीचा उमेदवार ठरेना!

जयंत पाटील विरोधकांनीही दिवाळीचा मुहूर्त साधत एकदिलाने लढण्याची घोषणा केली. मात्र नगराध्यक्षपदाचा उमेदवार कोण, याबाबत कोणतीही चर्चा झाली नव्हती. सोमवारी (ता. २७) मुंबईत पालकमंत्री चंद्रकांत पाटील यांनी येथील जयंत पाटील विरोधकांची बैठक बोलावली होती. त्या बैठकीत घटक पक्षांचे म्हणणे ऐकून घेतले. त्यावर प्रदेश पातळीवरून महायुतीमधील उमेदवार याबाबत निर्णय घेतला जाणार असल्याचे कार्यकर्त्यांना सांगितला आहे, असा दावा जयंत पाटील यांनी केला.