Kolhapur: कोल्हापुरचे माजी महापौर महादेवराव आडगुळे यांच्या कुटुंबावर शोककळा: १७ वर्षांच्या नातवाची आत्महत्या

Kolhapur Teen Suicide: कोल्हापुरातील माजी महापौर आणि जेष्ठ वकील महादेव आडगुळे यांच्या नातवाने आत्महत्या केली आहे. रौनक इंद्रजीत आडगळे (१७) असे नातवाचे नाव आहे. रौनकने अचानक जीवन संपवल्याने आडगुळे कुटुंबावर दुखा:चा डोंगर कोसळला आहे. मिळालेल्या माहितीनुसार, रौनकने आपल्या राहत्या घरी आत्महत्या केली. कोल्हापुरातील जुना बुधवार पेठ येथील राहत्या घरी रौनकने आत्महत्या केली असून पुढील तपासणीसाठी त्याचा मृतदेह छत्रपती प्रमिलाराजे रुग्णालय शेंडा पार्क येथे पाठवण्यात आला आहे.

रौनकचे आजोबा महादेव आडगुळे यांची कोल्हापुर पंचक्रोशीत ज्येष्ठ वकील अशी ओळख आहे. ते कोल्हापुर महापालिकेचे महापौर राहिलेले आहेत. तर रौनकचे वडिल इंद्रजीत आडगुळे हे सामाजिक कार्यकर्ते आहेत. १७ वर्षाचा रौनक हा इंद्रजीत आडगुळे यांचा चिरंजीव तर महादेवराव अडगुळे यांचा नातू आहे.

अवघ्या १७ वर्षाच्या हसत्याखेळत्या मुलाने अशा पद्धतीने आयुष्य संपवल्याने कुटुंबामध्ये मित्रपरिवारामध्ये शोककळा पसरली आहे. दरम्यान मिळालेल्या प्राथमिक माहितीनुसार, रौनकने नुकतीच १२ वीची परीक्षा दिली होती. त्याच्या आत्महत्येचं नेमकं कारण अद्याप समजू शकलेलं नाही.

मागील काही वर्षांमध्ये लहान मुलांच्या आत्महत्येत वाढ झाली आहे. एकूण आत्महत्यांमध्ये ३६ टक्के आत्महत्या १९ ते ३५ वर्षे या वयोगटातील आहेत. यात १ हजार ५५५ पुरुष आणि ३१७ महिलांचा समावेश आहे. या वयोगटातील तरुण-तरुणींमध्ये स्पर्धा परीक्षांमधील अपयश, नोकरीची अनिश्चितता, प्रेयसीकडून धोका, लग्नाला होणारा उशीर आणि आर्थिक स्वावलंबनाचा वाढता ताण यामुळे नैराश्य येत असल्याचे मानसोपचारतज्ज्ञ सांगतात.