Shashikant Shinde News : साताऱ्यात 'माथाडी' नेते समोरासमोर, पाटलांच्या 'त्या' आरोपाला शिंदेंचं प्रत्युत्तर; म्हणाले...

नरेंद्र पाटील ( Narendra Patil) यांना सत्तेमध्ये बसवताना मी मदत केली आहे. आता त्यांनी जे काही आरोप केले आहेत, त्याला माथाडी कामगारच उत्तर देतील, असं प्रत्युत्तर राष्ट्रवादी काँग्रेस शरदचंद्र पवार पक्षाचे साताऱ्यातील उमेदवार शशिकांत शिंदे ( Shashikant Shinde ) यांनी दिलं. आपल्यावर होणारे आरोप हे राजकीय आहेत, असंही शशिकांत शिंदेंनी म्हटलं. सातारा लोकसभेसाठी अर्ज दाखल केल्यानंतर शशिकांत शिंदे प्रसारमाध्यमांशी संवाद साधत होते.

नरेंद्र पाटील काय म्हणाले?

"सातारा जिल्ह्याचा लोकसभेचा तुतारीचा उमेदवार हा मुंबई कृषी उत्पन्न बाजार समितीमध्ये सार्वजनिक स्वच्छतागृहात घोटाळा करतो, हे खूप लांच्छनास्पद आहे. त्याचे मला खूप वाईट वाटते. अशा व्यक्तीला उमेदवारी मिळत असेल, तर मग शरद पवार ( Sharad Pawar ) यांना आम्ही काहीच बोलू शकत नाही," अशी टीका आण्णासाहेब पाटील आर्थिक विकास महामंडळाचे अध्यक्ष नरेंद्र पाटील ( Narendra Patil ) यांनी शशिकांत शिंदेंवर ( Shashikant Shinde ) केली होती.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

यावर शशिकांत शिंदे म्हणाले, "सातारा जिल्ह्यासाठी विकासाची दूरदृष्टी ठेवून काम करणार आहे. सार्वजनिक स्वच्छतागृहाबाबत नरेंद्र पाटलांच्या टीकेला मी उत्तर देणार नाही. माथाडी कामगार त्यांना उत्तर देतील. त्यांना सत्तेवर बसवताना मी सहकार्य केलं होतं. माथाडी कामगार सक्षम असून, कोणाच्या मागे उभे राहायचं, हे त्यांना कळतं."

"माथाडी कामगारांना छत्र आणि अधिकार शरद पवारांनी दिले आहेत. माझ्यावरील आरोप राजकीय स्वरूपातून होत आहेत. त्याबाबत न्यायालयात जे होईल, ते मला मान्य आहे. राजकारणात कूटनीती होत असते, हा त्याचाच भाग आहे," असं शशिकांत शिंदेंनी म्हटलं.

R