Mohite Patil Politic's : मोहिते पाटलांची सोलापूर शहरातील राजकारणात एन्ट्री; नाराज साठे गटाच्या भूमिकेकडे लक्ष

Solapur, 19 July : राष्ट्रवादी काँग्रेस शरदचंद्र पवार पक्षाच्या सोलापूर जिल्हाध्यक्षपदी मोहिते पाटील समर्थक वसंतराव देशमुख यांच्या नियुक्तीनंतर पक्षात स्फोट झाला. जिल्हा परिषदेचे माजी अध्यक्ष बळीराम साठे यांनी जिल्हाध्यक्षपदावरून अवमानकारक पद्धतीने हटविल्याचा आरोप करत बंडाचा झेंडा फडकावला. पण, पक्षाध्यक्ष शरद पवारांच्या शब्दानंतर साठे यांनी राष्ट्रवादीत राहण्याचा निर्णय घेतला.

सोलापूर लोकसभा मतदारसंघातील तालुक्यांची जबाबदारी बळीराम साठे (Baliram Sathe) यांच्याकडे देऊन त्यांना जिल्हाध्यक्ष करण्याचे संकेत पवारांनी दर्शविले होते. मात्र, त्याबाबतचा निर्णय महिनाभरानंतरही होऊ शकलेला नाही. त्या पार्श्वभूमीवर मोहिते पाटलांनी सोलापूर शहरात लक्ष घालून कार्यकर्त्यांच्या बैठका घेण्यास सुरुवात केली आहे, त्यामुळे साठे समर्थकांची भूमिका काय असणार, याकडे राजकीय वर्तुळाचे लक्ष लागले आहे.

लोकसभा आणि विधानसभा निवडणुकीपर्यंत राष्ट्रवादी काँग्रेस शरदचंद्र पवार पक्षात सर्वकाही आलबेल होते. मात्र, लोकसभेला माढ्याची, तर विधानसभेत चार जागा जिंकल्यानंतर पक्षात गटबाजीला सुरूवात झाल्याची कूजबुज ऐकू येऊ लागली. विशेषतः मोहिते पाटील (Mohite Patil) आणि बळीराम साठे यांच्यात मोहोळ विधानसभा मतदारसंघातील ‘एबी फॉर्म’वरून वाद झाला होता, त्याबाबत खुद्द साठे यांनी सांगितले आहे.

बळीराम साठे यांना पक्षाच्या जिल्हाध्यक्षपदावरून हटविल्यानंतर राष्ट्रवादी काँग्रेस शरदचंद्र पवार पक्षात स्फोट झाला. आपल्याला अवमानकारक पद्धतीने जिल्हाध्यक्षपदावरून हटविण्यात आल्याचा आरोप साठे यांनी केला. तसेच, मोहिते पाटील आणि जयंत पाटील यांच्यावर साठे यांनी जोरदार शब्दांत हल्लाबोल केला होता. तसेच पक्ष सोडून जाण्याचा इशारा दिला होता.

शरद पवार यांनी बळीराम साठेंना सोलापूर लोकसभा मतदारसंघातील तालुक्याची जबाबदारी देऊन जिल्ह्याच्या पूर्व भागाची जबाबदारी देण्याचे संकेत दिले होते. त्यात सोलापूर शहरासह अक्कलकोट, दक्षिण सोलापूर, उत्तर सोलापूर, मोहोळ, मंगळवेढा या तालुक्याचा समावेश होऊ शकतो. पण त्याबाबतची कार्यवाही अद्याप झाली नाही. साठे समर्थकांना त्या घोषणेची प्रतीक्षा आहे.

तत्पूर्वीच मोहिते पाटील यांनी सोलापूर शहरात लक्ष घालण्यास सुरुवात केली आहे. खासदार धैर्यशील मोहिते पाटील हे नुकतेच सोलापूर शहरात आले होते. त्या वेळी त्यांनी शहरातील पदाधिकाऱ्यांशी शासकीय विश्रामगृहात चर्चा केली. त्या वेळी जिल्हाध्यक्ष वसंतराव देशमुख आणि जिल्हा कार्याध्यक्ष रवींद्र पाटील उपस्थित होते.

येत्या ऑगस्टच्या पहिल्या आठवड्यात जिल्हा परिषद निवडणुकीच्या अनुषंगाने ग्रामीण भागातील कार्यकर्त्यांची बैठक होणार आहे. त्यानंतर सोलापूर महापालिकेसाठी शहरातील कार्यकर्त्यांची बैठक होणार आहे. या दोन्ही बैठका खासदार धैर्यशील मोहिते पाटील यांच्या उपस्थितीत होणार आहेत. त्यामुळे साठे यांच्याकडे धुरा येण्याआधीच मोहिते पाटील यांनी बैठका घेण्यास सुरुवात केली आहे. त्यामुळे नाराज साठे समर्थकांची भूमिका काय असणार, याकडे सर्वाचे लक्ष असणार आहे.