Walmik Karad : वाल्मिक कराडला फर्ग्युसन जवळ ऑफिस खरेदीसाठी मदत करणारी 'ती' महिला कोण?

Pune News : सरपंच संतोष देशमुख यांच्या हत्या प्रकरणातील आरोपी वाल्मिक कराड याच्याकडे गडगंज संपत्ती असल्याचे आरोप करण्यात आले आहेत. याबाबत भाजप आमदार सुरेश धस यांनीच अनेकदा आवाज उठवला आहे. तर आता शरद पवार यांच्या राष्ट्रवादीच्या खासदार सुप्रिया सुळे यांनी देखील यावरून सरकारला घेरताना कराडची चौकशी ईडी का करत नाही? असा सवाल केला आहे. तर कराड याची पुण्यात संपत्ती असल्याचे दावे केले जात आहेत.

दरम्यान पुण्यातील उच्चभ्रू सोसायटीत वाल्मिक कराडची स्थावर मालमत्ता आढळून आली. यातील एक संपत्ती फर्ग्युसन रस्त्यावर आणि दुसरी वाकड येथे आहे.

सरपंच संतोष देशमुख यांची हत्या अपहरण करून करण्यात आली होती. तर आर्थिक घडामोडीतून झाल्याचे समोर आले आहे. त्यांनी खंडणी मागणाऱ्या कराड यांच्या साथिदारांना विरोध केल्यानेच त्यांची हत्या करण्यात आली. यानंतर आता सर्व आरोप आणि वाल्मिक कराड SIT सह सीबीआयच्या ताब्यात असून नव नवे खुलासे समोर येत आहेत.

वाकडचा 4BHK फ्लॅट सील

आता कराड याच्या पुण्यातील मालमत्तेचे प्रकरण उघड झाले आहे. पिंपरी चिंचवड शहरातील वाकड परिसरात असलेल्या पार्क स्ट्रीट या उच्चभ्रू सोसायटीतील वाल्मिक कराड आणि त्याची पत्नी मंजली यांच्या नावे मालमत्ता आहे. येथे 4BHK फ्लॅटची मिळकत असून ता आता प्रशासनाने सील केली आहे. तर ही कारवाई कर न भरल्यामुळे पिंपरी चिंचवडच्या महापालिकेच्या कर संकलन विभागाकडून करण्यात आली आहे.

दरम्यान कराडला पुण्यातील प्राइम लोकेशन असलेल्या फर्ग्युसन रस्त्यावर ऑफिस घेतल्याचा दावा देखील समोर आला आहे. पण या ठिकाणी मालमत्ता घेण्यासाठी एका महिलेनं मदत केल्याचे देखील समोर आले आहे. पण आता ही महिला कोण असा सवाल उपस्थित केला जात आहे.

पुण्यातील फर्ग्युसन रस्त्यावरील एका इमारतीचे काम सुरू असून येथे कराड याने दोन ऑफिस घेतले आहेत, असा दावा भाजपचे आमदार सुरेश धस यांनी केली होता. याबाबत त्यांनी पैठणच्या सभेत दावा केला होता. तर ही गुंतवणूक एका महिलेच्या नावावर केल्याचेहा आरोप धस यांनी केला होता. यानंतर आता खरी माहिती समोर आली असून त्या महिलेचे नाव उघड झाले आहे.

वाल्मिक कराड याची गुंतवणूक आपल्या नावे करणाऱ्या महिलेचे नाव ज्योती जाधव आहे. वाल्मिक कराड याने ज्योती जाधव या महिलेच्या नावाने दोन ऑफिसेस खरेदी केली असून याचे कागदपत्रे समोर आली आहेत. ज्योती जाधव या महिलेने फर्ग्युसन रस्त्यावरील कुशल वॉल स्ट्रीट या इमारतीत काम सुरू असतानाच गुंतवणूक केली आहे. येथे ऑफिस नंबर 610 सी अपार्टमेंट आहे. जो 45.71 चौ. मी कार्पेट क्षेत्र आहे. याला बाल्कनी आणि पार्किंगची जागा आहे.

तर दुसरी मालमत्ता ही 611बी या ऑफिसचा असून तो 54.51चौसर मिटर आहे. यालाही बाल्कनी आणि खाली पार्किंग आहे. तर या मालमत्तेसाठी २५ कोटींची उलाढाल झाल्याचेही बोलले जात आहे. मात्र ज्योती जाधव या महिलेचा वाल्मिक कराड याच्याशी संबंध काय? याचे उत्तर अद्याप उघड झाले नसून याचा तपास ईडीकडून तपास होण्याची शक्यता आहे.