Narsayya Adam Master : माजी आमदार नरसय्या आडम यांना माकपकडून पुन्हा मानाचे पान!

Solapur, 02 March : मार्क्सवादी कम्युनिस्ट पक्षाचे माजी आमदार नरसय्या आडम मास्तर यांचा नुकत्याच झालेल्या विधानसभा निवडणुकीत पराभव झाला. मात्र, पक्षाकडून त्यांना पुन्हा एकदा मानाचे स्थान देऊन गौरविण्यात आले आहे. माजी आमदार आडम यांची माकपच्या विशेष निमंत्रित सदस्यपदी नियुक्ती करण्यात आली आहे, त्यामुळे पक्षासाठी आयुष्य देणारे नेते आडम मास्तर यांच्या कार्याचा विशेष सन्मान करण्यात आला आहे.

दरम्यान, नरसय्या आडम मास्तर (Narsayya Adam Master) यांनी यापूर्वी मार्क्सवादी कम्युनिस्ट पक्षाच्या केंद्रीय पॉलिट ब्यूरोमध्ये सदस्य म्हणून काम केले आहे. तसेच, महाराष्ट्र विधानसभेत तीनवेळा त्यांनी माकपचे प्रतिनिधीत्व केले आहे. सत्ताधारी पक्षांकडून ऑफर असतानाही आडम मास्तर यांनी कायम पक्षासोबत निष्ठेने राहणे पसंत केले आहे, त्यामुळे पक्षात त्यांना मानाचे स्थान असल्याचे नव्या निवडीवरून दिसून येते.

मार्क्सवादी कम्युनिस्ट पक्षाचे (CPM) राज्याचे २४ वे अधिवेशन अहिल्यानगर जिल्ह्यातील सेलू या ठिकाणी झाले. हे अधिवेशन २७, २८ फेब्रुवारी आणि १ मार्च असे तीन दिवस पार पडले. त्या अधिवेशनात मार्क्सवादी कम्युनिस्ट पक्षाच्या निवडी पार पडल्या. कॉम्रेड डॉ. अजित नवले यांची माकपच्या राज्य सचिवपदी वर्णी लावण्यात आली आहे, तर माजी आमदार नरसय्या आडम मास्तर यांची विशेष निमंत्रित सदस्यपदी, एम. एच. शेख यांची सचिव मंडळ सदस्यपदी निवड झाली आहे.

सेलू येथे पार पडलेल्या तीन दिवसीय अधिवेशनासाठी राज्यभरातून ३३७ प्रतिनिधी आले होते. या अधिवेशनात ५० सदस्यांची नवीन राज्य कमिटी आणि १५ सदस्यांचे राज्य सचिव मंडळ निवडण्यात आले आहे. डॉ. अजित नवले यांची या नवनिर्वाचित कमिटीने राज्याचे नवीन सचिव म्हणून एकमताने निवड केली आहे.

सोलापूर जिल्ह्यातील माकपचे ज्येष्ठ नेते तथा माजी आमदार नरसय्या आडम यांना पक्षाच्या समितीवर विशेष निमंत्रित सदस्य म्हणून नियुक्त करण्यात आले आहे. ॲड. एम. एच. शेख यांची राज्य सचिव मंडळ सदस्यपदी, तर माकपचे जिल्हा सचिव युसूफ शेख मेजर, नसीमा शेख, नलिनी कलबुर्गी, ॲड अनिल वासम, दत्ता चव्हाण यांची राज्य समिती सदस्यपदी निवड करण्यात आली आहे.