सातारा जिल्ह्यात मदत व पुनर्वसन मंत्री मकरंद पाटील आणि खासदार नितीन पाटील यांनी राष्ट्रवादी काँग्रेसला मजबूत करण्यासाठी ‘बेरजेचे राजकारण’ सुरू केले, ज्यामुळे शरद पवार गटाला मोठा धक्का बसला आहे.
माणचे नेते प्रभाकर देशमुख आणि राष्ट्रवादी शरद पवार गटाचे जिल्हाध्यक्ष सुनील माने हे उपमुख्यमंत्री अजित पवार यांच्या नेतृत्वाखाली राष्ट्रवादी काँग्रेसमध्ये प्रवेश करणार असून हा कार्यक्रम 9 नोव्हेंबर रोजी रहिमतपूर येथे होणार आहे.
या प्रवेशांमुळे राष्ट्रवादी काँग्रेसची ताकद माण तालुक्यात आणि रहिमतपूर परिसरात वाढणार आहे, तसेच स्थानिक स्वराज्य संस्था आणि पुढील विधानसभा निवडणुकांसाठी राजकीय समीकरणे बदलण्याची शक्यता आहे.
Satara, 07 November : स्थानिक स्वराज्य संस्थांच्या निवडणुकीच्या पार्श्वभूमीवर सातारा जिल्ह्यात मदत आणि पुनर्वसन मंत्री मकरंद पाटील आणि त्यांचे बंधू, खासदार नितीन पाटील यांनी बेरजेचे राजकारण करण्यावर भर दिला आहे. उपमुख्यमंत्री अजित पवार यांच्या नेतृत्वाखाली जिल्ह्यात पुन्हा जोरदार मुसंडी मारण्यासाठी सरसावलेल्या राष्ट्रवादी काँग्रेसच्या गळाला दोन मोठे नेते लागले आहेत. दोन्ही पाटलांच्या खेळीमुळे राष्ट्रवादी काँग्रेस शरदचंद्र पवार पक्षाचे प्रदेशाध्यक्ष शशिकांत शिंदेंना धोबीपछाड मिळाली आहे.
बहुचर्चित माणचे नेते प्रभाकर देशमुख, राष्ट्रवादी काँग्रेस शरदचंद्र पवार पक्षाचे जिल्हाध्यक्ष सुनील माने (Sunil Mane) लवकरच राष्ट्रवादीत प्रवेश करणार आहेत. जिल्हाध्यक्ष सुनील माने हे समर्थकांसह पक्ष प्रवेशासाठी पवार यांचा येत्या रविवारी (ता. 09 नोव्हेंबर) रहिमतपूरला कार्यक्रम घेतल्याचे खासदार नितीन पाटील यांनी सांगितले. त्यामुळे जिल्हाध्यक्षच साथ सोडून जाणार असल्याने प्रदेशाध्यक्ष शशिकांत शिंदे यांना धक्का बसणार आहे.
सातारा (Satara) जिल्ह्यात सध्या स्थानिक स्वराज्य संस्थांच्या निवडणुकीचे पडघम जोरजोरात वाजू लागले आहेत. नगरपालिका निवडणुकीसाठी येत्या सोमवारपासून उमेदवारी अर्ज दाखल करण्याची प्रक्रिया सुरू होत आहे, त्यामुळे प्रत्येक पक्ष पालिकेच्या निवडणुकीत आपली ताकद आजमविण्याचा प्रयत्न करणार आहे. त्यासाठी काही जण स्थानिक आघाड्यांच्या माध्यमातून, तर काही जण स्वबळाची ताकद यामध्ये लावणार आहेत. त्यासाठी राजकीय खल सुरू आहे.
या पार्श्वभूमीवर सध्या जिल्ह्यात पक्ष प्रवेशाचे जोरदार वारे वाहू लागले आहे. काही जण सत्तेसोबत राहण्यासाठी, तर काही जण स्थानिक स्वराज्य संस्थांच्या निवडणुकीत उमेदवारी मिळावी, यासाठी प्रवेश करत आहेत. काही जण विधानसभेच्या आगामी निवडणुकीत होणाऱ्या मतदारसंघाच्या पुनर्रचनेनंतर आमदार होण्याची संधी मिळेल, या आशेने प्रवेश करत आहेत. यामध्ये भाजप, राष्ट्रवादी काँग्रेस पक्ष आणि शिवसेनेला प्राधान्य दिले आहे.
राष्ट्रवादी काँग्रेसची दुभंगलेली ताकद पुन्हा वाढविण्यासाठी मदत आणि पुनर्वसनमंत्री पाटील आणि खासदार नितीन पाटील यांनी सातारा जिल्ह्यात बेरजेचे राजकारण सुरू केले आहे. यामध्ये त्यांच्या गळाला जिल्ह्यातील अनेक मातब्बर नेते लागले आहेत. यामध्ये माणचे नेते प्रभाकर देशमुख, राष्ट्रवादी कॉँग्रेस शरदचंद्र पवार पक्षाचे जिल्हाध्यक्ष सुनील माने यांचा समावेश आहे. हे नेते लवकरच हातात घड्याळ बांधणार आहेत. यामुळे राष्ट्रवादीची ताकद माण तालुक्यात वाढणार आहे.
जिल्हा परिषदेच्या निवडणुकीसाठी हे प्रवेश महत्त्वपूर्ण ठरणार आहेत. विधानसभेची २०२९ मध्ये होणारी निवडणूक डोळ्यासमोर ठेऊन हा निर्णय होत असल्याचे सांगितले जात आहे. सुनील माने यांच्यामुळे रहिमतपूर नगरपालिकेसह सह्याद्री कारखान्यातील काही संचालकांची ताकद उपमुख्यमंत्री अजित पवार यांच्या राष्ट्रवादीला मिळणार आहे.
Q1. सातारा जिल्ह्यात कोणत्या नेत्यांनी राष्ट्रवादी काँग्रेसमध्ये प्रवेशाचा निर्णय घेतला?
A1. प्रभाकर देशमुख आणि जिल्हाध्यक्ष सुनील माने यांनी राष्ट्रवादी काँग्रेसमध्ये प्रवेशाचा निर्णय घेतला आहे.
Q2. हा पक्षप्रवेश कधी आणि कुठे होणार आहे?
A2. 9 नोव्हेंबर रोजी रहिमतपूर येथे उपमुख्यमंत्री अजित पवार यांच्या उपस्थितीत होणार आहे.
Q3. या प्रवेशाचा सर्वाधिक फटका कोणाला बसणार आहे?
A3. राष्ट्रवादी काँग्रेस शरदचंद्र पवार गटाचे प्रदेशाध्यक्ष शशिकांत शिंदे यांना याचा मोठा धक्का बसणार आहे.
Q4. या राजकीय हालचालींचा परिणाम कोणत्या निवडणुकांवर होईल?
A4. स्थानिक स्वराज्य संस्था आणि 2029 च्या विधानसभा निवडणुकांवर या हालचालींचा प्रभाव दिसेल.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.