Satara ZP : साताऱ्यात ZP सभापती निवडीतही भाजपला पोलिसांचीच मदत? अनिल देसाई अन् संदीप मांडवेंनी सांगितली खेळी

Satara, 04 April : सातारा पोलिसांनी आमची ठिकठिकाणी अडवणूक, तपासणी करण्यात आली. जाणूनबुजून आम्हाला सभागृहात वेळेवर पोचू दिले नाही. आम्ही सभागृहात १२ वाजून १० मिनिटांनी पोचलो, पण प्रशासनाने आम्हाला सभागृहात उमेदवारी अर्ज भरण्यासाठी वेळ दिला नाही, त्यामुळे आम्ही जिल्हा आणि पोलिस प्रशासनाचा निषेध करत सातारा जिल्हा परिषदेच्या विषय समित्यांच्या सभापतिपदाच्या निवडीवर बहिष्कार टाकला आहे, असे राष्ट्रवादी काँग्रेसचे जिल्हा परिषद सदस्य अनिल देसाई आणि संदीप मांडवे यांनी सांगितले.

अनिल देसाई (Anil Desai) म्हणाले, आम्हाला सभागृहात सोडावे, यासाठी आम्ही वीस मिनिटे पोलिसांशी झगडत आहोत. प्रशासनाकडे निवडून आलेल्या सदस्यांची यादी आहे, आम्हाला पाच मिनिटांत सर्वांना सभागृहात सोडायला पाहिजे होते. मात्र, आम्हाला मोबाईल घेऊन जाऊ नका, असे आज सांगण्यात आले.

सातारा जिल्हा परिषद (Satara Zilla Parishad) अध्यक्ष-उपाध्यक्ष निवडणुकीच्या वेळी सर्व सदस्य मोबाईल घेऊन आतमध्ये गेले होते. मात्र, आम्हाला आज जाणीवपूर्वक आडविण्यात आले. प्रशासनाने उमेदवारी अर्ज भरायला वेळ दिला नाही. लोकशाहीचा खून करणाऱ्या जिल्हा प्रशासन आणि पोलिस प्रशासनाचा निषेध करतो, असा आरोप राष्ट्रवादी काँग्रेसचे अनिल देसाई यांनी केला.

देसाई म्हणाले, आम्हाला सभापती निवडीसाठी प्रशासनाने उमेदवारी अर्ज भरू दिला नाही. मागच्या अध्यक्ष-उपाध्यक्ष निवडीसाठी ११ ते ११.३० असा उमेदवारी अर्ज भरण्यासाठी वेळ दिला होता. मात्र आज सभापतिपदाच्या निवडणुकीसाठी १० ते १२ अर्ज भरायचा वेळ आहे, असे सांगत होते. पोलिसांनी आमचे अपहरण केले, त्याचा खुलासा करावा, अशी मागणी जिल्हाधिकारी पाटील यांच्याकडे केले.

पोलिसांच्या मदतीने भारतीय जनता पक्षाने आमचे दोन सदस्य पळवून नेल्याची आम्हाला माहिती मिळाली. काल गुंडांच्या मदतीने दोन सदस्य पळविले. आमचं ३३ संख्याबळ आहे. आजही आमच्याकडे ३१ सदस्य उपस्थित आहे, असा दावा अनिल देसाई यांनी केला.

संदीप मांडवे म्हणाले, जिल्हा बॅंकेच्या जवळ बॅरिकेड्‌स लावलेल्या ठिकाणी आम्हाला अडविण्यात आले. झेडपीच्या गेटवर आणि मेटल डिटेक्टरच्या ठिकाणी पोलिसांनी अर्धा तास अडविण्यात आले. त्यांनी आम्हाला वेळेवर पोचू दिले नाही. आतमध्ये गेल्यानंतर आमचे मोबाईल काढून घ्या, असे सांगण्यात आले. आम्ही १२ वाजून १० मिनिटांच्या आसपास सभागृहात पोचलो. जाणून बुजून अडवणूक करून आम्हाला सभागृहात वेळेवर पोचू दिले नाही.

आमच्याकडे ३३ लोकांचे बहुमत आहे. पण आम्हाला मतदानापासून वंचित ठेवण्याचे काम पोलिस प्रशासनाकडून करण्यात आलेली आहे. प्रशासनाने लोकशाहीची हत्या करण्यात आलेली आहे, असा आरोप मांडवे यांनी केला.