Solapur Politic's : मी लिहून देते, भाजपच्या लोकांना विमानसेवा सुरू करणं जमणार नाही; काडादींच्या भेटीनंतर प्रणिती शिंदेंचा हल्लाबोल

Siddheshwar Sugar Factory's Chimney : भाजपच्या लोकांनी वैयक्तीक दुश्मनी आणि राजकीय हेतूपोटी सिद्धेश्वर साखर कारखान्याची चिमणी पाडली. आता बघूयात किती दिवसात तुम्ही तुमची विमानसेवा सुरू करताय, बघूयात बोरामणी विमानतळासाठी निधी आणून विमानसेवा सुरू करतायत. मी लिहून देते की त्यांना हे जमणार नाही, अशा शब्दांत काँग्रेस आमदार प्रणिती शिंदे यांनी भाजपवर हल्लाबोल केला. (Praniti Shinde's criticism of BJP from the Chimney of Siddheshwar Sugar Factory)

सोलापुरातील (Solapur) सिद्धेश्वर सहकारी साखर कारखान्याची (Siddheshwar Sugar Factory) को-जनरेशनची चिमणी पडल्यानंतर त्याचे राजकीय पडसाद उमटत आहेत. आज काँग्रेसच्या प्रदेश कार्याध्यक्ष आमदार प्रणिती शिंदे (Praniti Shinde), माजी आमदार मधुकरराव चव्हाण यांनी कारखान्याचे संचालक धर्मराज कडादी यांची भेट घेतली. भेटीनंतर माध्यमांशी बोलताना त्यांनी भाजपवर हल्लाबोल करत सत्ताधारी भाजपला चॅलेंज केले.

त्या म्हणाल्या की, "बघूयात किती दिवसात तुम्ही तुमची विमानसेवा सुरु करताय, बघूयात ते बोरामणी विमानतळाला फंड आणून विमासेवा सुरु करताय.. मी लिहून देते की त्यांना ते जमणार नाही, त्याच्यावरून हे सिद्ध होतं की, फक्त वैयक्तिक राजकीय हेतूपोटी, दुश्मनी काढून चिमणी पाडण्यात आली आहे.

लाखो शेतकऱ्यांचे आयुष्य उद्‌ध्वस्त करण्यासाठी आणि पोटावर पाय देण्यासाठी हे सत्ताधारी ५० खोकेवाले आणि भाजप सरकार जबाबदार आहे. आम्ही काडादी आणि सभासद शेतकरी, कामगारांना मदत करण्यासाठी तयार आहोत, असेही शिंदे यांनी स्पष्ट केले.

दरम्यान, घडलेल्या सर्व प्रकारचा आम्ही निषेध करत आहोत. सर्व शेतकऱ्यांसोबत आमची सहानुभूती आहे. वैयक्तिक दुश्मनी आणि इगोमुळे हे केलं गेलं आहे. भाजपची मोडस ऑपरेटन्सी ही अशा पद्धतीने काम करायची आहे. ईडी आणि इतर संस्थांच्या मदतीने वैयक्तीक दुश्मनी काढण्याचे काम केले जात आहे.

भाजपवाल्यांना विकास काम कारणं जमत नाही. महाराष्ट्रातील लोकांना कसं मानसिक छळायचे, हेच त्यांना व्यवस्थित जमत"असं म्हणत प्रणिती शिंदे यांनी भाजपावर तोफ डागली.