Ajit Pawar : तुमच्याकडून सांगितली जाईल तेवढी आर्थिक तरतूद विधी व न्याय विभागाला केली जाईल : अजित पवार

Indapur, 25 January : इंदापूर : इंदापूर येथील पुणे जिल्हा आणि अतिरिक्त सत्र न्यायालयाच्या इमारतीचे उच्च न्यायालयाच्या न्यायमूर्ती श्रीमती रेवती मोहिते डेरे यांच्या हस्ते उदघाटन करण्यात आले. या कार्यक्रमाला उच्च न्यायालयाच्या न्यायमूर्तींसह राज्याचे उपमुख्यमंत्री अजित पवार, क्रीडा मंत्री दत्तात्रेय भरणे हेही उपस्थित होते

इंदापूर (Indapur) येथील जिल्हा आणि अतिरिक्त सत्र न्यायालयाच्या आवारात पुणे जिल्हा सत्र व अतिरिक्ति न्यायालयाचे प्रमुख न्यायमूर्ती महेंद्र महाजन यांच्या अध्यक्षतेखाली हा कार्यक्रम झाला. या कार्यक्रमाला उच्च न्यायलयाचे न्यायमूर्ती न्यायमूर्ती संदीप मारणे, आरिफ सा. डॉक्टर यांच्यासोबत उपमुख्यमंत्री पवार, क्रीडामंत्री भरणे, खासदार सुप्रिया सुळे, माजी सहकार मंत्री हर्षवर्धन पाटील हेही उपस्थित होते.

या वेळी क्रीडा मंत्री दत्तात्रेय भरणे, उपमुख्यमंत्री अजित पवार (Ajit Pawar) यांची भाषणे झाली. ते म्हणाले, येत्या फेब्रुवारी महिन्यात केंद्र सरकारचा अर्थसंकल्प सादर होईल. त्यानंतर मार्च महिन्यात राज्य सरकाचा अर्थसंकल्प सादर केला जाणार आहे, त्यात कोणत्या विभागाला किती तरतूद करायची, हेच काम सध्या अर्थ मंत्रालयाचे चालले आहे.

विधी आणि न्याय विभागाच्या सचिवांकडून जी काही माहिती येईल आणि तरतूद करायला सांगितली जाईल, तेवढी सगळी तरतूद आमच्या सरकारडून विधी आणि न्याय विभागाला करण्यात येईल, असा शब्द उपमुख्यमंत्री अजित पवार यांनी इंदापूरच्या कार्यक्रमातून दिला.