Solapur, 25 January : दोन्ही राष्ट्रवादी काँग्रेस एकत्र आल्यानंतर माढा आणि पंढरपुरात उमेदवारी वाटपाचे अधिकार हे राष्ट्रवादी काँग्रेस शरदचंद्र पवार पक्षाचे आमदार अभिजीत पाटील यांच्याकडे आले. त्यांनी मानेगाव जिल्हा परिषद गटातून इच्छूक असलेले राष्ट्रवादी काँग्रेसचे नेते दादासाहेब साठे यांच्याकडे ‘मानेगाव गटातून उमेदवारी हवी असेल तर माढा नगरपंचायतीची आगामी 2026 ची निवडणूक लढवणार नाही, असे तुम्ही आणि तुमची पत्नी नगराध्यक्षा ॲड मीनल साठे यांनी स्टॅम्प पेपरवर लिहून द्यावे’ अशी मागणी केली, असा दावा साठे यांनी केला आहे, त्यामुळे माढ्याच्या राजकारणात एकच खळबळ उडाली आहे.
दादासाहेब साठे म्हणाले, नगराध्यक्ष अॅड. मीनल साठे यांची निवडणूक प्रभारी म्हणून नियुक्ती करण्यात आली होती. मात्र, दोन्ही राष्ट्रवादी एकत्रितपणे लढणार असल्याने, प्रत्यक्षात निवडणुकीची सर्व सूत्रे मोहिते पाटील आणि आमदार अभिजीत पाटील यांच्या हाती देण्यात आली. त्या पार्श्वभूमीवर पक्षांतर्गत पातळीवर काही जागांची मागणी करण्यात आली होती. परंतु, मागील माढा विधानसभा निवडणुकीत अॅड. मीनल साठे यांनी आमदार अभिजीत पाटील (Abhijeet Patil) यांच्या विरोधात निवडणूक लढवली, याचा राग मनात ठेवून पक्षाचा एबी फॉर्म देण्यात आला नाही.
महिलांना राजकारणात समान संधी देण्याची भूमिका पक्षाचे सर्वेसर्वा माजी कृषिमंत्री शरद पवार (Sharad Pawar) यांनी मांडली असून, महिलांसाठी ५० टक्के आरक्षणाचा निर्णय घेतला आहे. अशा वेळी त्याच पक्षाचा आमदार महिलांच्या निवडणूक लढवण्यावर अटी घालत असेल, तर ही बाब पक्षाच्या तत्वांनाच छेद देणारी असल्याचे साठे यांनी स्पष्ट केले.
डॉ. बाबासाहेब आंबेडकरांनी दिलेल्या संविधानाने प्रत्येक नागरिकाला निवडणूक लढवण्याचा अधिकार दिला आहे. त्या अधिकारावर गदा आणण्याचा प्रयत्न म्हणजे केवळ व्यक्तीवर अन्याय नसून भारतीय संविधान आणि लोकशाही मूल्यांचा अपमान आहे, असा आरोपही साठे यांनी केला.
भाजप सरकार संविधान बदलणार असल्याचा मुद्दा मांडून लोकसभा निवडणूक लढवली गेली आणि त्याच मुद्द्यावर जनतेने विश्वास टाकला. मात्र, त्याच पक्षाचे आमदार लोकशाही अधिकारांवर बंधने आणण्याचा प्रयत्न करत असतील, तर ही बाब अत्यंत निंदनीय आणि चिंताजनक असल्याचे साठे म्हणाले.
या संपूर्ण प्रकरणावर पक्षश्रेष्ठी आणि वरिष्ठ नेतृत्वाने तातडीने आपली भूमिका स्पष्ट करावी, तसेच महिलांच्या अधिकारांवर गदा आणणाऱ्या या प्रकाराची दखल घ्यावी, अशी मागणी दादासाहेब साठे यांनी केली. या वेळी नगराध्यक्षा अॅड. मीनल साठे, नगरसेवक अजिनाथ माळी, शिवाजी जगदाळे, नितीन साठे यांच्यासह राष्ट्रवादी काँग्रेसचे पदाधिकारी उपस्थित होते.
पवारांसमोर दिलेला शब्द दादा साठेंनी पाळला नाही; म्हणून...: आमदार पाटील
ज्येष्ठ नेते शरद पवारांसमोर विधानसभेला दादा साठे यांनी दिलेला शब्द पाळला नाही. साठेंनी विश्वासार्हता गमावली आहे, त्यामुळे त्यांना स्टॅम्पवर लिहून मागितले असल्याचे आमदार पाटील यांनी स्पष्ट केले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.