MNS Politic's : कल्याण डोंबिवलीमधील निर्णयाबाबत ठाकरेंच्या शिलेदाराने मनसेला सुनावले; ‘किमान आमच्याशी चर्चा करायला हवी होती’

Mumbai, 25 January : कल्याण डोंबिवली महापालिकेत भारतीय जनता पक्ष आणि शिवसेनेमध्ये सत्तास्थापनेसाठी चढाओढ सुरू होती. मात्र, महाराष्ट्र नवनिर्माण सेनेच्या पाच नगरसेवकांचा पाठिंबा मिळवत उपमुख्यमंत्री एकनाथ शिंदे यांच्या नेतृत्वाखालील शिवसेनेने सत्तास्थापनेचा आपला दावा मजबूत केला आहे. दरम्यान, शिवसेना उद्धव बाळासाहेब ठाकरे पक्षाचे आमदार वरूण सरदेसाई यांनी मनसे आणि शिंदेसेनेच्या युतीवर नाराजी व्यक्त करताना मनसेने किमान आमच्याशी चर्चा करायला होती, अशा शब्दांत मनसे नेत्यांना सुनावले आहे.

महाराष्ट्र नवनिर्माण सेना आणि शिवसेना उद्धव बाळासाहेब ठाकरे पक्षाने कल्याण डोंबिवली महापालिकेची निवडणूक एकत्रित लढवली होती, त्यामुळे मनसेची ही नैतिक जबाबदारी होती, त्यांनी उपमुख्यमंत्री एकनाथ शिंदे यांच्यासोबत जाण्याआधी आमच्यासोबत किमान चर्चा तरी करायला हवी होती. पण, मनसे हा पक्ष वेगळा आहे, त्यांनी तो निर्णय घेतला आहे, असेही वरूण सरदेसाई (Varun Sardesai) यांनी स्पष्ट केले.

कल्याण डोंबिवली महापालिका निवडणुकीत मनसे आणि शिवसेना उद्धव बाळासाहेब ठाकरे पक्षाची युती होती. यात शिवसेना उद्धव बाळासाहेब ठाकरे पक्षाचे ११ नगरसेवक निवडून आले होते. मात्र, कोकण भवनात गटाची नोंदणीवेळी ठाकरेंचे फक्त 7 नगरसेवक उपस्थित होते. उर्वरित चार नगरसेवकांपैकी दोघे बेपत्ता असून ते शिंदे गटाच्या गळाला लागल्याची शक्यता वर्तविली जात आहे. ठाकरे गटाचे दोन नगरसेवक मनसेत (MNS) गेले आहेत. या घडामोडीनंतर मनसेने एकनाथ शिंदे यांना पाठिंबा दिला आहे.

दरम्यान, कल्याण डोंबिवलीमधील राजकीय घडामोडींवर राज ठाकरे यांनीही भाष्य केले होते. तेथील राजकारणाचा आपल्याला किळस आला आहे, असे म्हटले होते. मात्र, मनसेनेने एकनाथ शिंदे यांना पाठिंबा देण्याच्या निर्णयावर ठाकरेंचे आमदार वरुण सरदेसाई यांनी नाराजी व्यक्त केली आहे.

कल्याण डोंबिवलीमधील नगरसेवकांनी आज पुन्हा उद्धव ठाकरे यांची भेट घेतली आहे. त्यांनी पक्षाचा निर्णय आम्हाला मान्य असेल, असा शब्द ठाकरेंना दिलेला आहे. शिवसेना उद्धव बाळासाहेब ठाकरे पक्षाने कल्याण डोंबिवलीमध्ये विरोधी बाकावर बसण्याचा निर्णय घेतला आहे, असे आमदार वरुण सरदेसाई यांनी सांगितले.