Mahayuti Dispute : चव्हाणांच्या विधानामुळे महायुतीमध्ये वातावरण तापणार; शिवसेनेचा मंत्री समन्वय समितीच्या बैठकीत मुद्दा मांडणार

1. भाजप प्रदेशाध्यक्ष रवींद्र चव्हाण यांच्या "२ तारखेपर्यंतच युती" या विधानामुळे महायुतीत तणाव निर्माण झाला असून शिवसेना हे प्रकरण समन्वय समितीत मांडणार आहे.

2. शंभूराज देसाई यांनी चव्हाण यांच्या विधानाची तथ्यस्थिती समजून घेण्यासाठी बैठक घेण्याची मागणी केली असून, हे वक्तव्य निवडणुकीच्या काळात संभ्रम निर्माण करणारे असल्याचे म्हटले.

3. महायुतीतील निर्णय एकनाथ शिंदे घेणार असून, मतदानानंतर होणाऱ्या बैठकीत या विधानावर सविस्तर चर्चा होणार आहे.

Satara, 28 November : भाजपचे प्रदेशाध्यक्ष रवींद्र चव्हाण यांनी मला दोन तारखेपर्यंत युती टिकवायची आहे, असे विधान केल्यानंतर राज्याच्या राजकारणात एकच खळबळ उडाली आहे. महायुतीमध्येही त्यावरून नाराजीनाट्य सुरू झाले आहे. शिवसेनेचे वरिष्ठ नेते तथा मंत्री शंभूराज देसाई यांनी हा विषय महायुतीच्या समन्वय समितीच्या बैठकीत उपस्थित करणार असल्याचे स्पष्ट केले आहे, त्यामुळे ऐन निवडणुकीत महायुतीत राजकीय वातावरण तापण्याची शक्यता आहे.

देसाई म्हणाले, भाजपचे प्रदेशाध्यक्ष रवींद्र चव्हाण (Ravindra Chavan)यांनी ‘दोन तारखेपर्यंत युती टिकवायची आहे,’ असे विधान कोणत्या संदर्भाने केलेले आहे, हे त्यांनाच विचारावं लागेल. महायुतीत शिवसेना, भाजप आणि राष्ट्रवादी काँग्रेस प्रमुख पक्ष आहोत. नगरपालिका निवडणुकीपूर्वी महायुतीच्या समन्वय समितीच्या बैठकीत एकनाथ शिंदे यांच्या संमतीने मी आणि उदय सामंत यांनी शिवसेनेची भूमिका स्पष्ट केलेली आहे.

जिथं शक्य आहे, तिथं आम्ही युती करू. पण, युती नसेल त्या ठिकाणी मैत्रीपूर्ण लढू, असे सांगितलं आहे. आम्हाला दोन तारखेपर्यंतच युती टिकवायची आहे. दोन तारखेनंतर काय करायचं, याबाबतचं अधिकृत स्टेटमेंट आमच्या पक्षाकडून आलेलं नाही. आम्ही युतीमध्ये आहोत, युतीत राहण्याची आमची तयारी आहे. पण असं काही वक्तव्य भाजपच्या जबाबदार प्रदेशाध्यक्षांकडून येणार असेल तर ते योग्य नाही, असेही शंभूराज देसाई (Shambhuraj Desai) यांनी नमूद केले.

शंभूराज देसाई म्हणाले, नगरपालिका निवडणुकीचे मतदान झाल्यावर महायुतीच्या समन्वय समितीची जेव्हा बैठक होईल, तेव्हा शिवसेनेच्या वतीने आम्ही हा विषय समितीपुढं मांडू. त्या समितीमध्ये खुद्द प्रदेशाध्यक्ष रवींद्र चव्हाण, महसूल मंत्री चंद्रशेखर बावनकुळे, राष्ट्रवादीचे प्रदेशाध्यक्ष सुनील तटकरे हे आहेत. त्या बैठकीत याबाबत चर्चा करण्यात येईल. तुम्ही कुठल्या उद्देशाने हे बोलला होता. त्यासंदर्भातील तुमचं काय मत आहे. आम्ही त्या बैठकीत चर्चा करू.

शिवसेनेच्या संदर्भाने निर्णय घेण्याचे अधिकार हे पक्षाचे मुख्य नेते तथा उपमुख्यमंत्री एकनाथ शिंदे यांना आहेत. बैठकीतील चर्चेची माहिती आम्ही शिंदे यांना देऊ, त्यानंतर काय होतं ते बघू, असे ही सूचक विधान देसाई यांनी केले.

ते म्हणाले, निवडणुकीच्या तोंडावर असं वक्तव्य येणं, म्हणजे जिथं आम्ही महायुती म्हणून लढतोय, तिथं या विधानाचा परिणाम होणार ना? निवडणुका अंतिम टप्प्यात असताना जबाबदार नेत्याकडून असं विधान येणं म्हणजे संभ्रम निर्माण करणारं आहे.

1. प्र. वादाची सुरुवात कशामुळे झाली?
   उ: रवींद्र चव्हाण यांच्या "२ तारखेपर्यंत युती टिकवायची" या विधानामुळे.

2. प्र. शिवसेना हे प्रकरण कुठे मांडणार आहे?
   उ: महायुतीच्या समन्वय समितीच्या बैठकीत.

3. प्र. शिवसेनेत अंतिम निर्णय कोण घेतो?
   उ: उपमुख्यमंत्री एकनाथ शिंदे.

4. प्र. हे विधान समस्यात्मक का मानले जात आहे?
   उ: कारण निवडणुकीच्या अंतिम टप्प्यात मतदारांमध्ये संभ्रम निर्माण होऊ शकतो.