Santosh Deshmukh Murder Case : संतोष देशमुख हत्या प्रकरण; राष्ट्रवादीच्या 'या' नेत्यासह पदाधिकाऱ्यांची सीआयडीकडून आठ तास चौकशी

Beed News : वीस दिवसांपूर्वी केज तालुक्यातील मस्साजोगचे सरपंच संतोष देशमुख यांचे अपहरण करून त्यांची हत्या करण्यात आली. संतोष देशमुख यांच्या हत्येच्या घटनेमुळे राज्यातील वातावरण चांगलेच तापले आहे. शनिवारी बीडमध्ये मोर्चा निघाला होता. त्यामुळे या प्रकरणाचा तपास सीआयडीकडे सोपवण्यात आला आहे. त्यामुळे सीआयडीकडून या चौकशीबाबत प्रचंड गुप्तता पाळण्यात येत असून राष्ट्रवादी कॉँग्रेस अजित पवार गटाच्या एका नेत्यासह 40 पदाधिकाऱ्यांची सुमारे आठ तास चौकशी करण्यात आली.

दरम्यान, दोन दिवसांपूर्वी सीआयडीकडून वाल्मिकी कराड यांच्या पत्नीची चौकशी करण्यात आली होती, आता या प्रकरणात मोठी बातमी समोर येत आहे. त्यानुसार रविवारी राष्ट्रवादी काँग्रेस अजित पवार (Ajit Pawar) गटाच्या नेत्यासह 40 पदाधिकाऱ्यांची चौकशी करण्यात आली. बीड शहर पोलीस ठाण्यात चौकशी करण्यात आल्याची माहिती समोर येत आहे.

राष्ट्रवादी युवती प्रदेशाध्यक्षांची आठ तास चौकशी

सरपंच संतोष देशमुख हत्या प्रकरणात सीआयडीकडून राष्ट्रवादी युवती प्रदेशाध्यक्ष संध्या सोनवणे यांची तब्बल आठ तास चौकशी करण्यात आली. बारा वाजता चौकशीसाठी आलेल्या संध्या सोनवणे या सव्वा आठ वाजता पोलीस ठाण्याच्या बाहेर निघाल्या.

या चौकशीनंतर राष्ट्रवादी (NCP) युवती प्रदेशाध्यक्ष संध्या सोनवणे म्हणाल्या, 'मला चौकशीसाठी बोलावले होतं. त्यांनी जी प्रश्न केली, मी त्यांना उत्तर दिले आहे. यानंतरही चौकशीसाठी बोलावले तर मी येईल. मला फोन आला होता. तुम्हाला चौकशीसाठी यावे लागेल, त्यामुळे मी आले.' रविवारी दिवसभरात जवळपास 40 पदाधिकाऱ्यांची वेगवेगळ्या ठिकाणी चौकशी करण्यात आली.

दरम्यान, सीआयडीचे पोलीस अधीक्षक सचिन पाटील बीडमध्ये दाखल झाले आहेत. संतोष देशमुख हत्या प्रकरणातील आरोपींच्या संपर्कात असलेल्या लोकांची चौकशी सुरू आहे. अधिकृत माहिती देण्यास सीआयडी अधिकाऱ्यांनी नकार दिला असून आतापर्यंत शंभरहून जास्त लोकांची चौकशी करण्यात आली.