Tejaswi Ghosalkar : तेजस्वी घोसाळकरांनी फेरलं भाजपच्या मनसुब्यावर पाणी; संचालक होताच थेट मातोश्रीवर...

Mumbai News : भाजपच्या ताब्यात असलेल्या मुंबई जिल्हा मध्यवर्ती सहकारी बँकेच्या संचालकपदी दोनच दिवसापूर्वी शिवसेना उद्धव बाळासाहेब ठाकरे पक्षाच्या माजी नगरसेविका तेजस्वी घोसाळकर यांची नियुक्ती करण्यात आली. त्यानंतर तेजस्वी घोसाळकर या उद्धव ठाकरे यांची साथ सोडून लवकरच भाजपमध्ये प्रवेश करणार असल्याच्या चर्चा रंगल्या होत्या. मात्र, या सुरु असलेल्या सर्व चर्चाना पूर्णविराम देताना तेजस्वी यांनी निवड झाल्यानंतर थेट मातोश्रीवर जाऊन पक्षप्रमुख उद्धव ठाकरे यांची भेट घेतली. या भेटीनंतर त्यांनी प्रसार माध्यमाशी बोलताना मोठे विधान केले आहे.

मुंबई जिल्हा बँक भाजपच्या (BJP) ताब्यात आहे. आमदार प्रवीण दरेकर हे बँकेचे अध्यक्ष आहेत. त्यांचे पती अभिषेक घोसाळकर यांच्या निधनाने रिक्त असलेलया संचालक पदावर तेजस्वी यांची नियुक्ती करण्यात आली. त्यांची संचालकपदी वर्णी लागताच तेजस्वी घोसाळकर लवकरच भाजपमध्ये प्रवेश करणार अशा चर्चांना उधाण आले होते. मात्र, या सर्व सुरु असलेल्या चर्चाना त्यांनी पूर्णविराम देत त्यांनी त्यांची भूमिका शनिवारीच स्पष्टपणे मांडली होती.

त्यानंतर रविवारी दुपारी त्यांनी थेट मातोश्रीवर जाऊन उद्धव ठाकरे (Uddhav Thackery) यांची भेट घेतली. यावेळी रश्मी ठाकरे या देखील उपस्थित होत्या. या भेटीनंतर त्यांनी येत्या काळात उद्धव ठाकरे यांच्या नेतृत्वाखालीच पक्षाचे काम प्रभावीपणे करणार असल्याचे सांगत त्यांनी भाजपसोबत जाणार असल्याच्या चर्चावर पडदा टाकला आहे.

दरम्यान, काही दिवसांपूर्वी घोसाळकरांनी शिवसेना विभागीय पदाचा राजीनामा दिला होता. त्यामुळे तेजस्वी या ठाकरे गटात नाराज असल्याची चर्चा होती. त्यानंतर चार दिवसापूर्वी मातोश्रीवर झालेल्या माजी नगरसेवकाच्या बैठकीला तेजस्वी यांनी हजेरी लावली होती. त्यानंतर शुक्रवारी मुंबई बँकेंच्या संचालकपदी तेजस्वी यांची नियुक्ती झाल्याने भाजप त्यांना आपल्या पक्षात घेण्यासाठी पाऊले टाकत असल्याची चर्चा सुरू झाली होती.

या सर्व चर्चा फेटाळून लावत मी उद्धव ठाकरे यांच्या पक्षातच राहणार असून त्यांची साथ सोडणार नसल्याचे तेजस्वी घोसाळकर यांनी प्रसार माध्यमाशी बोलताना स्पष्ट केले. काही दिवसापूर्वी मी पक्षावर नाराज होते पण माझी नाराजी आता दूर झाली आहे. मी राजकारण आणि सहकार बाजुला ठेवून समाजकरणाचे काम येत्या काळात करणार असल्याचे तेजस्वी घोसाळकर यांनी सांगितले.