Thackeray Brother allince : काँग्रेसने भूमिका क्लिअर करताच ठाकरे बंधूंची वाट मोकळी : मातोश्री-शिवतीर्थावर हालचाली वाढल्या

Mumbai News : आगामी काळात होत असलेल्या मुंबई महापालिकेच्या दृष्टीने सर्वच राजकीय पक्षाने तयारी सुरु केली आहे. त्यातच निवडणुकीची घोषणा होण्यापूर्वीच महाविकास आघाडीतील घटक पक्ष असलेल्या काँग्रेसने उद्धव ठाकरेंची शिवसेना व शरद पवार यांच्या राष्ट्रवादी काँग्रेसची साथ सोडत निवडणुकीसाठी स्वबळ आजमावण्याची घोषणा केली आहे. त्यामुळे आता उद्धव ठाकरे यांच्या शिवसेनेने एक पाऊल पुढे टाकले आहे. आगामी महापालिका निवडणुकीच्या पार्श्वभूमीवर ठाकरे बंधूंच्या युतीच्या जागावाटपाची चर्चा उद्यापासून सुरू होण्याची शक्यता आहे.

शिवसेना ठाकरे गटाचे पक्षप्रमुख उद्धव ठाकरे (Uddhav Thackeray) आणि मनसे प्रमुख राज ठाकरे यांनी सोमवारी बाळासाहेब ठाकरे यांच्या स्मृतीदिनाच्या निमित्ताने एकत्रित अभिवादन केले. तब्बल 11 वर्षांनी पुन्हा एकदा ठाकरे बंधू बाळासाहेबांच्या स्मृतीस्थळी एकत्र आले होते. त्यामुळे आता लवकरच मनसे व उद्धव ठाकरेंच्या शिवसेनेच्या युतीची बोलणी सुरु होणार आहे.

गेल्या काही दिवसापासून राज्यातील सर्वच राजकीय पक्ष मुंबई महापालिकेच्या निवडणुकींच्या तयारीला लागले आहेत. महाविकास आघाडीत काँग्रेसने वेगळी चूल मांडण्याची घोषणा केल्यानंतर आता ठाकरे बंधूनी निवडणुकीची तयारी सुरु केली आहे. हिंदी सक्तीच्या मुद्द्यावरून एकत्र आलेले राज (Raj thackeray) व उद्धव ठाकरे हे बंधू यांची आगामी निवडणुकीच्या पार्श्वभूमीवर युतीची चर्चा सुरू आहे.

गेल्या काही दिवसापासून ठाकरे बंधूंच्या भेटीगाठी वाढत आहेत. जुलै महिन्यापासून वेगवेगळ्या निमित्ताने ते एकमेकांना भेटत आहेत. सॊमवारी बाळासाहेबांचा स्मृतिदिन असल्यामुळे राज ठाकरे आणि उद्धव ठाकरे यांनी बाळासाहेबांच्या स्मृतीस्थळी जाऊन त्यांना अभिवादन केले. यावेळी राज व उद्धव ठाकरे काही काळ एकत्रही होते. त्यामुळे आता लवकरच दोन्ही पक्षादरम्यान चर्चेला सुरुवात होणार आहे.

महापालिकेच्या जागावाटपासाठी ठाकरे बंधूंच्या युतीच्या बोलणीला उद्यापासून सुरुवात होणार आहे. त्यासाठीच सोमवारी मनसेच्या प्रमुख नेत्याची शिवतीर्थावर बैठक होणार आहे. त्यामध्ये जागावाटपाबाबत प्राथमिक स्वरूपात चर्चा होणार आहे.त्यानंतर दोन्ही पक्षातील चर्चेला उद्यापासून अधिकृतरित्या सुरवात होणार असल्याचे समजते. दोन्ही पक्षात जागावाटपाची चर्चा होणार असल्याने उत्सुकता शिगेला पोहचली आहे.