Pune Congress : निवडणुकांच्या तोंडावर काँग्रेसचा 'मास्टरस्ट्रोक'! घराणेशाहीच्या आरोपांवर सडेतोड उत्तर! 'या' नव्या धोरणामुळे दिग्गजांना धक्का?

Pune News : काँग्रेसवर सातत्याने घराणेशाही बाबतचे आरोप केले जातात. विरोधी पक्षाकडून काँग्रेसमध्ये सुरू असलेल्या घराणेशाही वर पूर्वीपासून टीका होत आली आहे. मात्र, हे चित्र बदलण्याचा प्रयत्न देखील पक्षाकडून वारंवार करण्यात येतो. आता स्थानिक स्वराज्य संस्थांच्या निवडणुकांमध्ये तिकीट वाटपासाठी काँग्रेसने एक फॉर्मुला निश्चित केला असल्याचं बोललं जात आहे.

स्थानिक स्वराज्य संस्थांच्या निवडणुकीची रणधुमाळी सध्या राज्यभर सुरू आहे. नगरपालिका आणि नगरपंचायतीच्या निवडणुका आता अंतिम टप्प्यात आल्या आहेत. यानंतर जिल्हा परिषद आणि महापालिकेच्या निवडणुका होणार आहेत. मात्र या निवडणुकांमध्ये कोणाला उमेदवारी देण्यात येणार आणि निष्ठावंतांना न्याय मिळणार का? याबाबत सर्वत्र चर्चा सुरू आहे.

अशातच पुण्यातून महापालिका निवडणुकीच्या तिकीट वाटपाबाबत काँग्रेसने एक महत्त्वाचा निर्णय घेतला आहे. मात्र या निर्णयामुळे काँग्रेसमध्ये अंतर्गत वाद देखील निर्माण होण्याची शक्यता आहे. स्थानिक स्वराज्य संस्थांच्या निवडणुकांमध्ये आरक्षण सोडतीनंतर राजकीय वातावरण ढवळून निघाले आहे. अनेक प्रभागांमध्ये अनुकूल आरक्षण मिळाल्याने एकाच कुटुंबातील अनेक सदस्य निवडणुकीच्या रिंगणात उतरण्याच्या तयारीला लागले आहेत. मात्र, काँग्रेसने याला आळा घालण्यासाठी कठोर धोरण अवलंबले आहे.

पक्षाच्या शहराध्यक्ष अरविंद शिंदे यांनी स्पष्ट केले की, "काँग्रेस पक्ष एका कुटुंबातील फक्त एका सदस्यालाच तिकीट देईल. यात कोणतीही तडजोड केली जाणार नाही." हा निर्णय पक्षाच्या अंतर्गत बैठकीत घेण्यात आला असून, तो सर्व प्रभागांसाठी बंधनकारक आहे.

आरक्षण सोडतीमुळे काही प्रभागांमध्ये महिलांसाठी, अनुसूचित जाती-जमातींसाठी किंवा इतर राखीव जागा मिळाल्या आहेत. यामुळे कुटुंबातील एकापेक्षा अधिक सदस्यांना संधी मिळण्याची शक्यता वाढली होती. तसेच पक्षातील काही वरिष्ठ मंडळींनी आपल्या घरामध्ये दोन तिकीट मिळावी यासाठी जोर लावण्यात देखील सुरुवात केली आहे. मात्र, काँग्रेसने अशा प्रकरणांना रोखण्यासाठी ‘वन फॅमिली, वन टिकिट’ धोरण लागू केले आहे.

जर एखाद्या कुटुंबातील दोन किंवा अधिक सदस्य अर्ज करत असतील, तर त्यांच्यातील एकालाच प्राधान्य दिले जाईल. उर्वरितांना पक्षांतर्गत इतर जबाबदाऱ्या सोपवल्या जातील. यामुळे अनेक दिग्गज नेत्यांच्या कुटुंबियांना धक्का बसण्याची शक्यता आहे.