Shivsena : "हे सगळे गए गुजरे लोकं" निलम गोऱ्हेंच्या आरोपांना ठाकरेंचं प्रत्युत्तर

मुंबई : नीलम गोऱ्हे यांच्याबद्दल महिला म्हणून आदर आहे. मात्र राजकीयदृष्ट्या ही सगळी गयी गुजरी लोक आहेत. त्यांनी राजकारणात त्यांचं चांगभल करून घेतलं आहे. त्यांना आतापर्यंत चार वेळा आमदार केले, उपसभापती केले. मग त्यांनी किती मर्सिडीज दिल्या? असा सवाल करत शिवसेना (उबाठा) पक्षाचे प्रमुख उद्धव ठाकरे यांनी विधान परिषदेच्या उपसभापती नीलम गोऱ्हे यांच्या आरोपांना प्रत्युत्तर दिले. ते काँग्रेस नेते किरण काळे यांच्या पक्षप्रवेशावेळी बोलत होते.

उद्धव ठाकरे यांच्या शिवसेनेत (Shivsena) दोन मर्सिडीज दिल्या की एक पद मिळायचं, असा गंभीर आरोप नीलम गोऱ्हे यांनी केला. नवी दिल्लीतील 98 व्या अखिल भारतीय मराठी साहित्य संमेलनातील 'असे घडलो आम्ही' या कार्यक्रमात बोलताना त्यांनी हा दावा केला.

या आरोपांवर बोलताना ठाकरे म्हणाले, जाऊ द्या हो. ही सगळी राजकीयदृष्ट्या गयी गुजरी लोकं आहेत. एक महिला म्हणून त्यांच्याबद्दल आदर आहे. पण राजकारणात त्यांनी त्यांचं चांगभलं करून घेतलं आहे. त्याचवेळी ठाकरे यांच्या शेजारी बसलेले खासदार संजय राऊत (Sanjay Raut) म्हणाले, माझा एक प्रश्न आहे त्यांना. त्यांना आतापर्यंत चार वेळा आमदार केले. उपसभापती केले. त्यांनी किती मर्सिडीज दिल्या?

गोऱ्हे यांनी आतापर्यंत आठ मर्सिडिज दिल्या का? त्यांनी त्याची काही कागदपत्रे असली तर ती आणून द्यावीत, असे आव्हानही खासदार राऊत (Sanjay Raut) यांनी दिले. तर "ही नीलम गोऱ्हेंची नमकहरामी आहे"; असं म्हणत विधान परिषदेचे विरोधी पक्ष नेते अंबादास दानवे यांनी गोऱ्हेंच्या आरोपाला प्रत्युत्तर दिलं. "मी ग्रामीण भागातील सर्वसामान्य कार्यकर्ता आहे. पण आज मी राज्याचा विरोधी पक्षनेता आहे. मला पक्षाने वेगवेगळ्या कामासाठी निधी दिला. पक्षाने माझ्याकडे कधीही पैसे मागितले नाहीत." असेही त्यांनी सांगितले.