Dada Bhuse : शाळा दुरुस्तीचे पैसे आता थेट मुख्याध्यापकांच्या खात्यावर, शालेय शिक्षणमंत्री दादा भुसे यांची माहिती

ZP school News : जिल्हा परिषद शाळांमधील किरकोळ दुरुस्तीच्या कामांसाठी आता प्रशासकीय मंजुरीची दीर्घ प्रतीक्षा करावी लागू नये, यासाठी थेट मुख्याध्यापकांच्या खात्यावर निधी वर्ग करण्यात येणार आहे. शाळेची रंगरंगोटी, स्वच्छतागृहांची दुरुस्ती, शुद्ध पाण्याची व्यवस्था तसेच अन्य किरकोळ कामे तत्काळ करता यावीत, यासाठी हा निर्णय घेण्यात येणार असल्याची माहिती शालेय शिक्षणमंत्री दादा भुसे यांनी दिली.

शाळा व्यवस्थापन समितीला विश्वासात घेऊन मुख्याध्यापकांनी हा निधी खर्च करायचे आवाहन शालेय शिक्षणमंत्री दादा भुसे यांनी केले आहे. मराठा विद्याप्रसारक समाज शिक्षण संस्थेच्या (कै.) रावसाहेब थोरात सभागृहात शुक्रवारी (दि. १८) जिल्हा परिषद गुणवंत शिक्षक पुरस्कार वितरण सोहळा पार पडला. या वेळी मंत्री भुसे बोलत होते. या कार्यक्रमात त्यांच्या उपस्थितीत १५ गुणवंत शिक्षकांचा गौरव करण्यात आला.

दरम्यान, जिल्हा परिषदेच्या शाळांमधील विद्यार्थ्यांची घटती पटसंख्या तसेच मराठी विषयात नापास होणाऱ्या विद्यार्थ्यांचे प्रमाण लक्षणीय असल्याचे अधोरेखित करत मंत्री भुसे यांनी त्याबद्दल गंभीर चिंता व्यक्त केली. पटसंख्या वाढविण्यासाठी शिक्षकांसह पालक तसेच ग्रामस्थ आणि प्रशासनाने सध्याच्या प्रयत्नांपेक्षा किमान २५ टक्के अधिक योगदान देण्याचे आवाहनही त्यांनी केले.

शाळा केवळ सुरू ठेवणे किंवा बंद पडण्यापासून वाचविणे हा उद्देश नसून, विद्यार्थ्यांना गुणवत्तापूर्ण शिक्षण, चांगले संस्कार आणि आवश्यक सुविधा मिळाल्या पाहिजेत असे मंत्री भुसेंनी सांगितले.

पुरस्कार मिळाल्याने शिक्षकांची जबाबदारी वाढली आहे. गुणवत्तापूर्ण शिक्षण देण्यासोबतच संस्कार देण्याचे काम तसेच परिसरातील शाळा आदर्श करण्याचे काम शिक्षकांनी केले पाहिजे, असे आवाहन त्यांनी केले. यावेळी जिल्हापरिषदेचे सीईओ ओमकार पवार, मविप्र सरचिटणीस ॲड. नितीन ठाकरे, उपमहापौर विलास शिंदे आदी उपस्थितीत होते.

या शिक्षकांना मिळाला पुरस्कार

बागलाण : माधुरी सुभाष पवार, चांदवड : सतीश भाऊसाहेब अहिरे, देवळा : सतीश गोविंदराव आहेर, दिंडोरी : भिलाजी माधवराव पाटील, इगतपुरी : अवधूत रामदास खाडगीर, कळवण : सविता तानाजी भामरे, मालेगाव : मीना निशा देवरे, नांदगाव : गणेश पुंडलिक साळी, नाशिक : विवेक पुंडलिक खैरनार, निफाड : गौरी राजेंद्र गायवन, पेठ : योगेंद्र गणपत बोरसे, सिन्नर : प्रकाश दत्तू जगताप, सुरगाणा : सुधाकर कृष्णा भोये, त्र्यंबकेश्वर : संदीप दत्तात्रय गुंजाळ, येवला : योगेश बाळासाहेब माकोणे.