Malegaon Politics : मालेगावात मोठ्या घडामोडी : शिवसेनेने एमआएमला पाठिंबा मागितला? दादा भुसेंनी फिरवला फोन?

Malegaon political news : मालेगाव महापालिका निवडणुकीत इस्लाम पक्षानं वर्चस्व मिळवलं आहे. अवघ्या दीड वर्षापूर्वी माजी आमदार आसिफ शेख यांनी स्थापन केलेल्या या पक्षाने पहिल्याच प्रयत्नात सर्वाधिक ३५ जागा जिंकत बाजी मारली आहे. इस्लाम पक्षाने समाजवादी पक्षाशी युती केली होती. समाजवादी पक्षाला पाच जागा मिळाल्याने दोन्ही मिळून आता ४० जागा झाल्या आहेत. परंतु सत्ता स्थापनेसाठी ४३ जागा आवश्यक असल्याने ही मॅजिक फिगर गाठण्यासाठी मालेगावात घडामोडींना वेग आला आहे.

मालेगावात इस्लाम पक्षाने सर्वाधिक ३५, एमआयएमने २१ तर शिवसेनेने १८ जागांवर यश मिळविले आहे. समाजवादी पक्षाला ५, भाजपला २ तर कॉंग्रेसने तीन जागांवर विजय मिळविलं आहे. आता सत्तास्थापनेसाठी हालचाली गतिमान झाल्या आहेत. अशात मालेगाव महापालिका निवडणुकीत शिवसेना शिंदे गटाने आमचा पाठिंबा मागितला आहे असा दावा एमआयएमचे नेते इम्तियाज जलील यांनी केला आहे. पंरतु आम्ही शिवसेना व भाजपला पाठिंबा देणार नाही असही त्यांनी स्पष्ट केलं आहे. एका खासगी वृत्तवाहिनीशी ते बोलत होते.

भाजप व एकनाथ शिंदे यांची शिवसेना सोडून इतर कुणीही सकारात्मक पाठिंबा मागितला तर देऊ असे इम्तियाज जलील यांनी म्हटले आहे. भाजप शिवसेनेला बाहेर ठेऊन इतर पक्ष एकत्र येत असतील आणि सन्मानाने आम्हाला विचारणा करत असतील तर आम्ही त्यांच्यासोबत जाऊ असा खुलासा जलील यांनी केला आहे. कॉंग्रेसने तसेच शिवसेना शिंदे गटाने देखील एका ठिकाणी आमचे समर्थन मागितले आहे असा दावा त्यांनी केला. मात्र आम्ही त्यांना स्पष्ट शब्दात नकार दिल्याचे जलील म्हणाले.

मालेगाव देखील शिवसेनेने आमचा पाठिंबा मागितला आहे असा दावा जलील यांनी केला. मात्र कोणत्याही परिस्थितीत मालेगाव सारख्या ठिकाणी आम्ही एकनाथ शिंदे यांच्यासोबत जाणार नाही असं त्यांनी स्पष्ट केलं. त्यामुळे राजाच्या राजकारणात सातत्याने हिंदुत्वाचे गुणगान करणाऱ्या व त्यावरुन शिवसेना उद्धव ठाकरे गटाला लक्ष्य करणाऱ्या शिवसेना शिंदे गटाने जलील म्हणतात त्याप्रमाणे खरोखर एमआएमला पाठिंबा मागितला का? असा प्रश्न राजकीय वर्तुळात उपस्थितीत केला जात आहे.

मालेगावातील शिवसेनेचा कारभार जे चालवतात ते मंत्री दादा भुसे हे जलील यांच्या या दाव्यावर काय खुलासा करतात हेही पाहावे लागणार आहे. तर दुसरीकडे जलील यांनी भाजप शिवसेनेसोबत युती करण्यास नकार दर्शवून इस्लाम पार्टीसोबत हात मिळवण्याचे संकेत दिल्याचे बोलले जात आहे. परंतु आजवरचा मालेगावातील इतिहास पाहाता मालेगावात इस्लाम पार्टी व शिवसेना अशी युती होईल असे राजकीय जाणकारांचे मत आहे.