Nashik Crime : बारचालक महिलेने हिंमत दाखवली, भाजपचे मामा आता पुरते अडकले ; आणखी एक गंभीर गुन्हा दाखल

Nashik News : शिवसेना ठाकरे गटातून भाजप मध्ये दाखल झालेले मामा राजवाडे हे विसेमळा गोळीबार प्रकरणात सध्या मध्यवर्ती कारागृहात आहेत. अशात त्यांच्यावर आणखी एक गंभीर गुन्हा दाखल करण्यात आला आहे. पंचवटी पोलीस ठाण्यात दाखल झालेल्या नव्या गुन्ह्यामुळे त्यांच्या अडचणींमध्ये मोठी वाढ झाली आहे.

पोलिसांकडून मिळालेल्या माहितीनुसार, शहरातील मालेगाव स्टॅण्ड परिसरातील बारचालक महिलेला खंडणीसाठी धमकावत तसेच तिचा विनयभंग करत, बार व्यवस्थापकावर प्राणघातक हल्ला करणाऱ्या मामा राजवाडे, राहुल बागमारसह १६ जणांविरोधात खंडणी व विनयभंगाचा गुन्हा पंचवटी पोलिसात दाखल करण्यात आला आहे.

मामा राजवाडे यांच्या टोळीतील सदस्य बागमारसह पाच जणांना पोलिसांनी अटक केली असून त्यांना चांगला पोलिसी खाक्या दाखवला आहे. त्यांच्याही तोंडून नाशिक जिल्हा कायद्याचा बालेकिल्ला हे वाक्य वदवून घेण्यात आलं. त्या सर्वांना न्यायालयाने गुरुवारपर्यंत (ता. २३) पोलिस कोठडी सुनावली आहे. दरम्यान त्यांचे आणखी काही साथीदार हे फरार असून पोलिस त्यांचा शोध घेत आहे.

फिर्यादी महिला या मालेगाव स्टॅण्ड येथे न्यू पंजाब रेस्टॉरंट अॅण्ड बार चालवतात. मामा राजवाडे, राहुल बागमार याच्यासह त्याच्या साथीदारांनी या महिलेकडे पन्नास हजार रुपयांच्या खंडणीची मागणी केली होती. खंडणी न दिल्यास बारमध्ये तोडफोड करण्याची धमकी दिली होती. संशयितांनी एकदा बारमध्ये राडा घातला. संशयित प्रकाश गवळी याने पीडित बारचालक महिलेचे हात पकडले व विनयभंग केला. बारचे व्यवस्थापक राहुल नंदन यांनाही त्यांनी गंभीर मारहाण केली.

यांना झाली अटक...

राजवाडे टोळीतील - राहुल मगनलाल जैन- बागमार, प्रवीण सुकलाल कुमावत, बाबासाहेब शिवाजी बढे, प्रकाश पांडुरंग गवळी, योगेश हिम्मतराव पवार यांना पोलिसांनी अटक केली.

हे आजूनही फरार...

संशयित योगेश पवार, विशाल देशमुख, संदीप पवार, लखन पवार, शरद पवार, धिरज शर्मा, चैतन्य दत्तात्रेय कावरे यांच्यासह चार साथीदार हे फरार असून पोलिस त्यांचा शोध घेत आहे.