Rohit Pawar Secret Blast : रोहित पवारांचा गौप्यस्फोट; लोकसभेनंतर राज्यात मोठे राजकीय भूकंप होणार

Yavatmal News : लोकसभेची निवडणूक झाल्यानंतर मुख्यमंत्री एकनाथ शिंदे आणि उपमुख्यमंत्री अजित पवार गटातील काही आमदार भारतीय जनता पक्षामध्ये जाणार आहेत. लोकसभेनंतर राज्यात खूप मोठे भूकंप झालेले आपल्याला पाहायला मिळतील, असा गौप्यस्फोट राष्ट्रवादी काँग्रेसचे (शरद पवार गट) आमदार रोहित पवार यांनी केला. (Big political earthquake in the state after Lok Sabha Election : Rohit Pawar's secret blast)

आमदार रोहित पवार हे आज विदर्भाच्या दौऱ्यावर आहेत. यवतमाळ येथे पत्रकारांशी बोलताना पवार यांनी विविध विषयांवरील पत्रकारांच्या प्रश्नांना उत्तरे दिली. त्यावेळी रोहित पवार यांनी शिंदे गट आणि अजितदादा गटातील आमदारांच्या भाजप प्रवेशाबाबत मोठे भाष्य केले.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

शिंदे गट आणि अजितदादा गटातील आमदारांबाबत रोहित पवार म्हणाले की, असा अंदाज आहे की, लोकसभेनंतर शिंदे गटातील काही आमदार भाजपमध्ये जातील. तसेच, अजित पवार गटातीलही काही आमदार लोकसभेनंतर भाजपमध्ये जाऊ शकतात. काही आमदार अजितदादांसोबत राहू शकतात आणि काही लोकांमधील आमदार आहेत, ज्यांना मारून मुटकून त्यांच्यासोबत नेले आहे, ते आमच्याकडे परत येऊ शकतात, पण लोकसभा झाल्यानंतर त्यांचा उपयोग भाजपला राहणार नाही.

उपमुख्यमंत्री अजित पवार आणि केंद्रीय गृहमंत्री अमित शाह यांच्या भेटीवरही रोहित पवार यांनी खोचक टीका केली. अजित पवार हे स्वतः अर्थमंत्री आहेत. अर्थमंत्र्यांच्याच आमदारांना निधी मिळत नसेल, तर मग खरे अर्थमंत्री कोण आहेत, हा प्रश्न निर्माण होतो. कुठेतरी महायुतीमध्ये वाद आहे, हे आपल्या सर्वांपुढे आलेले आहे. केंद्रातील नेत्यांशी चर्चा करून वाद मिटेल किंवा मिटणार नाही, हे माहिती नाही. पण लोकसभेपर्यंत भाजप हा शिंदे गट किंवा अजित पवार गटाचा वापर करून घेईल. लोकसभेची निवडणूक झाल्यानंतर भाजप सवयीप्रमाणे या नेत्यांचे काय करेल, हा मोठा प्रश्न आहे, असेही रोहित पवार यांनी स्पष्ट केले.

रोहित पवारांनी नितेश राणेंना दिल्या शुभेच्छा...

नितेश राणे यांच्या टीकेला त्यांच्याच मतदारसंघातील लोक गांभीर्याने घेत नाहीत, मग मी कशाला घ्यायचं. त्यांना काय बोलयाचे ते बोलू द्या. जेव्हा निवडणूक येईल, तेव्हा जनताच त्यांच्याबाबत योग्य तो निर्णय घेईल; पण त्यांना मी शुभेच्छा देतो. कपडे बदलावे, तसे त्यांनी पक्ष आणि भूमिका बदलली. पूर्वीची आणि आताची त्यांची भाषणे कशी आहेत, हे सर्वांना माहिती आहे. मंत्रिपदासाठी ते कायम देवेंद्र फडणवीस यांना इम्प्रेस करण्याचा प्रयत्न करतात. ते माझे मित्र आहेत, मी त्यांना शुभेच्छा देतो की, तुम्ही तुमच्या नेत्याला खूप इम्प्रेस करा आणि मंत्रिपद मिळवा. आम्हाला लोकांचे प्रश्न समजून घेऊन ते सोडवायचे आहेत. ते सोडविण्याचा आमचा प्रयत्न आहे, असा टोलाही रोहित पवारांनी नितेश राणेंना लगावला.